PR Horta: Timor Oan Hotu Tenke Kontribui Hapara VD Iha TL
Naunil Media (Díli), Prezidente Repúblika (PR), José Ramos Horta, hateten Timor oan hotu tenke kontribui hapara Violensia Domestika (VD) iha Timor-Leste (TL) tanba rai ne’e terus barak ona iha nia istória.
Xefe Estadu hato’o lia hirak ne’e liu husi diskursu bainhira partisipa serimónia Marsa Diversidade ne’ebé hala’o iha palásiu Prezidensiál Nicolau Lobato Bairru Pite, Sesta (29/07).
“Ba membru sira ne’ebé hetan violensia hanesan ohin ko’alia ha’u lee istória barak ida ne’e ha’u hanesan Timor oan hanesan Prezidente Repúblika sente laran triste teb-tebes tanba rai ne’e terus barak ona iha nia istória, violensia domestika, ita tenke buka kontribui para hamate hapara violensia domestika iha rai ne’e, violensia kontra labarik, violensia kontra feto sira, violensia oioin labele iha violensia iha sosiedade ida ne’e labele iha diskriminasaun,” dehan Xefe Estadu
PR hateten Timor oan hotu-hotu halo parte umanidade, hotu-hotu Maromak nia oan, labele iha diskriminasaun, labele iha violensia ida-idak hakarak moris oinsá, tanba ne’e xefe estadu fiar Timor-Leste tenke hatudu duni hanesan modelu ida ka ezemplu ida ba respeitu, ba toleransia, ba alin no oan sira ne’ebé hola parte iha komunidade LGBTI tanba sira iha domin no matenek ba rai ida ne’e.
“Ba ha’u ne’e absolutamente normál la’ós normál buat ida violensia, la’ós ba diskriminasaun, la’ós normál diskrimina relijaun seluk hakarak de’it ita nia relijaun la’ós normál kuandu ita hakribi ema ne’ebé fiar seluk,” katak PR
Aman ba nasaun ne’e esplika guvernu, Parlamentu Nasionál, Igreja, sosiedade sivil ho pareseiru Internationál sira haree hanesan Embaixador Austrália, Embaixador Nova Zelándia, Embaixador Estadus Unidus no komunidade Estranjeiru lubuk ida iha ne’e, katak hatudu diversidade mundu nian hanesan respeita malu ne’e importante.*Jos
