Polísia Hetan Ona Motor Ida Lakon Iha Area Vila-Verde
Naunil Media (Díli), Domingo (31/07) ne’e hafoin simu orientasaun hosi Xefe Servisu Informasaun Polísia (SIP) Nasional, hodi buka tuir no identifika autor sira ba krime públiku mak hanesan kazu naok motor, hadau telfone no naok sasan husi kareta laran ne’ebe mak sempre akontese iha Díli laran.
“Ho ekipa servisu konsege asegura tan joven-1 ne’ebe deskunfia envolve iha kazu naok motor no suspeitu ne’e ho inisiál EFS alias J, idade 26, hela iha Kampung Baru, Comoro”.
Iha loron 29 fulan Julho 2022, ekipa simu informasaun husi vítima ho naran Oscar Lucio Afonso Soares, hela iha Dili, Suku Vila-Verde, katak nia motor marka Honda Beat ho Xapa Matrikula N.1403 TLS, ema naok iha area Villa-Verde tinan rua ona.
Ho nune’e ekipa dezenvolve tan kazu balu hosi suspeitu sira ne’ebe kaptura iha semana kotuk konsege identifika suspeitu EFS ne’ebe ligadu ho kazu naok motor ne’e.
Suspeitu EFS deklara, nia laos motor nain no nia ajuda deit nia maluk ida iha Baucau hodi mai trata dokumentu motor nian iha Dili.
Enkuantu motor refere sei iha hela suspeitu ho naran NM alias A, tinan 31, hosi Aldeia Dataua, Suku Kaibada, Postu Baucau-Vila, Munisipiu Baucau.
Hafoin rona deklarasaun ekipa SIP Nasional ba kedas Munisipiu Baucau hodi halo koordenasaun servisu ho SIP Baucau, la’o hamutuk buka tuir no konsege hetan NM sae hela motor iha area Seisal.
Iha momentu ne’e, nia koopera diak nune’e ekipa konjunta SIP lori kedas NM ba iha Komandu PNTL Munisípiu Baucau hodi halo identifikasaun.
Iha prosesu identifikasaun NM deklara katak nia hola motor Honda Beat ne’e hosi nia kolega ida naran AL iha fulan Dezembru tinan 2020 ho montante osan $500 (Dolar Amerikanu Atus Lima).
Nia Selu dala rua, primeiru selu uluk osan ho montante $350.00, ikus liu selu osan ho montante $150.00.
NM mos deklara katak, suspeitu AL iha Díli hela iha area Pantai Kelapa no iha Baucau AL hela iha area Postu Administrativu Laga.
Hafoin halo identifikasaun nia mos halo auto entrega motor refere ba PNTL no prontu atu mai hatan wainhira husi parte investigasaun presija nia prezensa hodi apoiu prosesu investigasaun.
Iha sorin seluk, vítima Oscar Lucio informa katak nia motor rua maka ema naok, ida maka Honda Beat lakon iha loron 23 novembru 2020 horas 03h30 otl no iha loron tuir mai loron 24 novembru 2020 horas 04:00 otl vítima nia motor Yamaha Vixion lakon tan iha nia uma Vila-Verde.
Atu buka tuir autor prinsipal ba kazu naok motor ne’e ekipa SIP sei relata identidade suspeitu sira nian ba Seksaun Investigasaun Komandu PNTL Munisípiu Díli hodi hato’o ba iha Ministériu Publiku atu bele hato’o pedidu ba tribunal hodi hasai mandadu detensaun no mandadu buka tuir suspeitu AL hodi bele identifika tan motor Yamaha Vixion ne’ebe mak lakon. Ana
