Duvida Ho Dezenvolvimentu GS PR Horta Bolu MPM

Naunil Media (Dili), Duvida ho dezenvolvimentu Greater Sunrise (GS) Prezidente Repúblika (PR) José Ramos Horta bolu Ministru Petróliu Minerais (MPM) Victor da Conceição Soares ho ekipa hodi esplika kona-ba Progresu diskusaun ne’ebé durante ne’e la’o.

Kestaun ne’e hato’o husi Ministru Petróliu no Minerais ba Jornalista sira hafoin remata enkontru ho Xefe Estadu iha palásiu Prezidensiál Nicolau Lobato Bairru Pite, Sengunda, (01/08).

“Ohin Prezidente Repúblika bolu mai iha ho Prezidente Timor Gap ho ANPM atu mai Prezidente iha duvida balun relasaun ho Progresu iha setor Petroliu Minerais, mas ohin husu liuliu ba dezenvolvimentu Greater Sunrise, Tantu la ko’alia buat barak ko’alia de’it kona-ba Progresu halo nusa ona tantu ida ne’e mak ohin ami ko’alia kona-ba diskusaun sira ne’ebé durante ne’e, ha’u hanoin maluk sira hatene kona-ba Progresu sira ne’ebé durante ne’e la’o,” dehan MPM

Membru guvernu ne’e hatutan agora dadaun iha meza de diskusaun entre guvernu Timor-Leste ho guvernu Austrália kona-ba dokumentu Petrolium Moning Code (PMC), Production Sharing Contract (PSC), fiskal rezim ho dokumentu lubuk ida seluk tan ne’ebé agora dadaun la’o hela no mós kalendariu ba dokumentu sira ne’e atu Konklui iha Novembru 2022.

“Apartir de ida ne’e tama ona ba faze seluk ida bolu dezenvolvimentu do kampu, ne’e orsida Timor Gap hanesan ita nia Sheare ne’ebé boot liu 56,56 pursentu ho Woodside hanesan operador ho mós Osaka Gás sira sei ko’alia hamutuk para kaolia kona-ba planu dezenvolvimentu,” katak membru guvernu
Ministru Petróliu no Minerais ne’e hateten PR mós husu tuir kona-ba Progresu negosiasaun no pozisaun Timor-Leste klaru katak konserteza kadoras mai iha Timor-Leste.
“Prezidente Repúblika ohin husu tuir situasaun sira ne’e i ha’u hanoin Progresu sira ne’e la’o di’ak negosiasaun la’o di’ak hotu i pozisaun Timor-Leste nian klaru kona-ba oinsá kadoras ne’e ba iha ne’ebé i konserteza ke durante ne’e ita ko’alia kona-ba kadoras mai iha Timor-Leste,” tenik Ministru Petróliu Minerais
Victor Soares esplika razaun polítika nein partidu polítika ida kontra kadoras mai iha Timor-Leste, iha razaun tekniku viabilidade tekniku komersiál ho ekonomiku atu nune’e informasaun sira husi ANPM ho Timor Gap fundamenta ona katak estudu viabilidade fundamentu sira ne’e permite para kadoras atu mai iha ne’e.
“Prezidente Repúblika como duvida ida ne’e, ne’e mak ohin ami mai, ami fo esplikasaun ba Prezidente Repúblika atu nune’e Prezidente bele kontinua hanesan Xefe Estadu atu ko’alia ba públiku pozisaun Timor-Leste nian,” katak Víctor Soares.
Tanba dadaun ne’e guvernu iha seriedade para atu bele rezolve problema Greater Sunrise, durante tempu naruk no hakarak duni tanba situasaun rai laran haree kampu Bayu-Undang mós termina ona no tenke fo atensaun fo prioridade atu aselera kampu Greater Sunrise ne’e para halo dezenvolve lalais.
Iha enkontru ne’e Prezidente Repúblika mós fo ezemplu bainhira bá vizita iha Indonézia iha interese balun ne’ebé hamutuk ho riku soin ne’ebé iha Indonézia, Timor-Leste, ho Austrália nia parte, oinsá futuru nasaun tolu ne’ebé rua Austrália ho Indonézia ne’ebé agora vizinu oin kotuk TL tenke servisu hamutuk ho sira atu dezenvolve interese nasaun tolu ne’ebé iha reziaun ida ne’e.*Jos