Autoridade Polísia Britânika Kontaktu PR Horta Hakalma Joven Iha Inglatera
Naunil Media (Dili), Autiridade Polísia Britânika kontaktu direitamente ba Prezidente Repúblika (PR) José Ramos Horta atu hakalma joven sira iha Inglatera tanba hafoer Timor-Leste nia naran iha rai li’ur.
Kestaun ne’e hato’o husi Xefe Estadu ba Jornalista sira bainhira hala’o vizita ba Servisu Autonomia Medikamentu Ekipamentu Saúde (SAMES), iha Kampo Alor, Segunda (01/08).
“Ne’e mak halo Timor nia naran foer aat iha Inglatera, Polísia Inglatera kontaktu ha’u direitamente, ema di’ak polísia iha ne’ebá ema matenek sira Email ba ha’u, Whatsapp ba ha’u, husu ha’u nia apoiu para hakalma joven sira iha ne’ebá ne’e,” dehan Xefe Estadu
PR hatutan Maioria 99% Timor oan sira iha Inglatera laiha problema, grupu kiik oan iha rai laran halo problema lori problema ba li’ur halo kualker dia polísia Ingles kaer sira hotu tau iha kaisote ida haruka fila mai Timor.
Antes ne’e Primeiru Ministru (PM) Taur Matan Ruak mós husu ba sidadaun sira ne’ebé iha rai li’ur tenke hatudu komportamentu ne’ebé di’ak tanba Timor-Leste hanesan nasaun ida nune’e komportamentu ema hotu nia tenke sibilizadu.
“Ha’u hanesan maun, aman, hanesan Primeiru Ministru ha’u husu ba ha’u nia oan sira ha’u nia alin sira, sidadaun sira ne’e para nia komportamentu ne’e tenke di’ak, ita nasaun ida, entaun ita nia komportamentu ne’e tenke sibilizadu uituan, tanba buat ne’ebé ita halo iha fatin seluk ne’e ita nia naran dois hotu,” dehan Xefe Guvernu
Taur mós triste bainhira Timor oan sira kontinua halo konfrontu iha ema nia rai tanba Timor uluk luta para atu hetan independensia nune’e foti Bandeira iha nasaun sira seluk.*Jos
