PR Horta: TL Tenke Halo Produsaun Medikamentu Balun
Naunil Media (Díli), Prezidente Repúblika (PR), hateten Timor-Leste (TL) tenke halo produsaun medikamentu balun labele 100% husi li’ur, kuandu tekniku la sufisiente bele halo parseria ho nasaun sira seluk.
Kestaun ne’e hato’o husi Xefe Estadu ba Jornalista sira bainhira hala’o vizita ba Servisu Autonomia Medikamentu Ekipamentu Saúde (SAMES), iha Kampo Alor, Segunda (01/08).
“Ha’u hanoin Timor bele halo liu tan ida mak tenke halo produsaun medikamentu balun labele 100% husi liur, i se ita laiha ema tekniku sufisiente bele halo parseria, Ha’u nia rekomendasaun mak ne’e Timor tenke haree kolaborasaun ho Brazil, ho Cuba, ho Portugál, ho Indonézia halo fabrika medikamentu ba ita rasik i ba merkadu iha li’ur i ha’u temi Portugál para tau Standar Uniaun Europeia nian,” dehan Xefe Estadu
PR hatutan Brazil produtor mundiál ba aimoruk jeneriku no Cuba fabrika medikamentu barak inklui China purtantu bele haree parseria di’ak ho sira uza fundu soberanu ke para halo investimentu duni, laiha investimentu ida ke bele di’ak liu gatante, la’ós autosufisiente 100% mas pelumenus 30% nune’e aimoruk uza ne’e bele halo iha rai laran.
Prezidente Prezidente Repúblika hateten vizita ba iha SAMES ne’e atu haree kondisaun ne’ebé funsiona no organizadu mezmu tinan hira nia laran hahu husi tempu UNTAET too agora.
“Ha’u hakarak haree kondisoens ne’ebé funsiona i buat ne’ebé ha’u haree, pelumenus suprefisialmente bele hateten hanesan organizadu sistema be monta tinan sira nia laran ne’e buat ne’e lá’os agora de’it, buat ne’e la’o neneik tempu UNTAET too agora hotu-hotu manán esperiénsia, balun iha estudus ne’ebé propriu ba ida ne’e Timor oan 100% mak iha ne’e uluk lae,” katak Prezidente Repúblika
Tanba SAMES rasik iha planu no foin dadaun inundasaun mai, mas sira mós halo tiha ona prevensaun moru, inundasaun mai tan karik sei kontrola di’ak liu tanba halo ona moru boot iha tempu badak kuandu Parlamentu Nasionál aprova orsamentu no Promulga sira bele halo infrastrutura foun ne’ebé adekuadu.*Jos
