Emanuel FC Kestiona FFTL Lakria Kondisaun Ba Klube Futebol Sira
Naunil Media (Díli), Prezidente klube Emmanuel FC, Aleixo Carvalho Monteiro, hateten Federasaun Futebol Timor-Leste (FFTL) foti jogador husi klube no asosiasaun sira ba selesaun nasional, maibe FFTL rasik lakria kondisaun di’ak ba klube futeból sira.
“Ami klube hamutuk asosiasaun no sentru juvenil sira mak prepara jogador husi juvenil to’o sénior hafoin federasaun tolan tomak ba selesaun nasional”, Prezidente Emanuel FC, Aleixo Carvalho Monteiro, ba jornalista sira iha nia knaar fatin Hudi Laran, Kuarta (03/08).
Aleixo Carvalho Monteiro, sujere ba Governu hamutuk ho FFTL atu investe ba klube futebol sira iha primeira no segundu divizaun, nune’e bele prepara jogador sira kualifikadu.
“Tenki tau atensaun ba ida ne’e, atu ita labele derrota hela de’it iha jogu internasional sira”, tenik Prezidente Emanuel FC.
Nia husu FFTL tenki servisu di’ak no tranparansia ba publiku atu ema hotu hatene dezenvolvimentu futebol iha Timor-Leste.
“Salariu funsiunáriu FFTL bo’ot liu jogador selesaun nasional sira, jogador treinu mate an iha kampu no joga to’o is atu kotu, sira hetan salariu ladun ekivalensia ho funsionariu federasaun”, dehan Aleixo. Ana
