Viola Kodigu Estrada, PNTL Prende Motor Hamutuk 90

Fahe Tutan

Naunil Media (Díli), Komandu Polísia Nasional Timor-Leste (PNTL) Munisípiu Díli hatun diretiva ba Komandante Esquadra PNTL sira, hamutuk ho Seksaun Tránzitu Munisípiu Díli hala’o atividade servisu operasional liu hosi patrulla la’o ain hodi halo monitorizasaun iha kada Suku inklui halo mos prevensaun seguransa rodoviária iha kapital Dili liu hosi ativitidade pasa revista ba motorizada hirak ne’ebe halo movimentu iha estrada publiku no konsege prende motorizada hamutuk 90 ne’ebe viola kodigu Estrada.

Tuir Komandante Komandu PNTL Munisipiu Dili, Superintendente Xefi Polisia, Henrique da Costa,hateten, atividade ne’e halo hodi eduka nafatin sidadaun sira atu respeita kodigu estrada.

“Ohin kalan hanesan baibain ita orienta eskuadra PNTL hotu kontinua halo knar operasaun rutina hodi halo Auto Stop ba motorizada sira ne’ebe halo movimentu iha tempu kalan hodi halo prevensaun ba asidente tráfiku no dezenvolve kampaña seguransa rodoviária bele eduka nafatin ita nia sidadaun sira hodi respeita leis tranzitu”,dehan Komandante Henrique, iha nia knar fatin Caicoli, Kuarta kalan (03/08).

Nia afirma, atividade ne’e halo hodi kontrola jestaun veikulus no kria ambiente kondusaun seguru ne’ebe efikas no efisiente ba motorista sira inklui hare mos ba sasan kontra bandu sira seluk.

“Ita foka deit ba motorizada no ita halo aprensaun ba motor hamutuk 90 kompostu husi motor 49 prende iha Eskuadra Cristo Rei, Becora no Eskuadra Dom-Aleixo ne’ebe halo check point iha Raikotu Comoro prende motor 41 enkuantu total hamutuk 90 ne’ebe viola dekretu lei no.6/2003, Kódigu Estrada”, relata nia.

Komandente akresenta, iha atividade pasa revista konsege identifika sidadaun barak maka kontra kódigu Estrada, tanba la monta asesores hanesan xapa matríkula oin kotuk, lampu no ispellu laiha, uza kanu racing halo barullu no maioria laiha karta kondusaun.

“Motorizada hirak ne’e sei entrega hikas nain, maibe ténki liuhusi prosesu administrasaun lori nota infrasaun ba selu multa iha banku BNCTL (Banco Nacional de Comércio de Timor-Leste) hafoin mai foti fali sira nia motor”,tenik nia. */Ana

Leave a Reply

Your email address will not be published.