PR Horta Fó Homenagen Ba Militar-Korea Na’in-5 Assidente Mota-Lori Iha Oe-Cussi

Fahe Tutan

Naunil Media (Díli), Prezidente Repúblika (PR), José Ramos Horta fó homenagen ba militar forsa de paz Korea nian ne’ebé lakon vida iha Oe-Cussi tanba hetan assidente mota mak lori.

“Ohin ita halibur aan iha ne’e besik tinan rua-nolu liu tiha, para halo liu husi Prezidensiá Repúblika halo homenagen ba militar forsa da paz Korea nian ne’ebé lakon sira nia vida iha assidente mota boot tun iha Oe-Cussi ne’ebá”, dehan Xefe Estadu liu husi diskursu bainhira halo homenagen ba militar Korea nain-lima ne’ebé hala’o iha palásiu Prezidensiál Nicolau Lobato Bairru Pite, Segunda (08/08).

Prezidente Repúblika mós lori nasaun Timor-Leste hakruk ba vitima sira ne’ebé hetan assidente mortal iha Oe-Cussi hanesan mós timor oan rihun ba rihun ne’ebé mós lakon durante tinan 24 nia laran.

“Ba família ne’ebé iha ne’e, ha’u hakruk ba imi lori nasaun tomak nia kondolensias ba imi, hamutuk ho imi tau neon ba vitima sira ne’e assidente mortal iha Oe-Cussi, Eventus hanesan ida ne’e iha Timor-Leste nia historia, ami mós familia lubuk ida iha Timor-Leste lakon Timor oan rihun ba rihun iha luta ida ne’e nia laran durante (24) anos, Ne’e duni nu’udar Timor oan komprende, hatene sente sofrimentu familia militár sira ne’e nian,” katak Prezidente Repúblika

Horta esplika Repúblika da Korea partisipa iha forsa dA paz ONU nian ne’ebé mai iha ne’e, tuir INTRRFET no depois forsa de paz ONU nian liu husi UNTAET hahú 1999 too final sira sai iha 2003.

Aman ba nasaun ne’e hateten iha periodu ne’ebá elementus balun forsa de paz ONU nian lakon sira nia vida hanesan Nova Zelándia ida lakon nia vida iha Suai, elementu forsa portugeza servicu helikoptru lakon nia vida assidente iha Alas, elementu seluk tan inklui pakistanes ida lakon vida wainhira sira tenta dez-ativa bonba iha Cristu Rei, no GNR ida mate iha Subaun assidente kareta wainhira nia fila husi Laleia ba halo dez-ativasaun bomba antigu ida iha Laleia.

Nia dehan rai doben Timor-Leste elementus internasionál balun militár, polísia, civil lakon sira nia vida, Repúblika da Korea ne’ebé partisipa makaas iha forsa de paz iha Timor-Leste lakon ema nain lima (5).

Iha fatin hanesan reprezentante familia Jung Hyein hateten sente laran susar duni ba família maibé sira nia oan, aman, laen sai hanesan baze fundasaun ba dezenvolvimentu iha Timor-Leste.

“Mezmu ami vizita fatin ida ne’e ho laran susar maibé, ami sente duni katak ami nia familia, ami nia laen, ami nia oan, ami nia aman sai duni hanesan baze fundasaun ba iha dezenvolvimentu Timor-Leste nian,” dehan reprezentante familia

Representante familia ne’e hatutan sira haree mós monumentu memorial no parke memorial ne’ebé halo iha Oe-Cussi sira sente duni katak sira nia prezensa nafatin iha Oe-Cussi, povu Timor-Leste nafatin hanoin sira ho nune’e wainhira, fila ba Korea mós sira sente hakmatek no sira deskansa hela iha lalehan mós kontenti wainhira haree faktus sira ne’e.

Nia mós agradese ba povu Timor-Leste, estadu Timor-Leste nafatin lembra sira nia familia ba dedikasaun iha Timor-Leste no, sira fila ba Korea mós sira nafatin reza ba Timor-Leste nia prosperu no dezenvolvimentu.

Militár Korea nain-lima (5) ne’e lakon vida iha mota Noel Ekat iha suku Bobometo, sub-reiziaun Oesilu, iha loron 06/03/2003, wainhira hala’o misaun paz ONU nian iha Timor-Leste, ne’ebé hetan assidente dezastre naturais udan boot mota tun nune’e forsa nain-lima ne’e atu ultrapasa maibé lakonsege.

Saudozu nain-lima ne’ebé mak mota lori iha momentu ne’ebá mak hanesan Tenente Koronel Byungjo Min, Tenente Koronel Jin Kyu Park, Sarjentu Jong Hoon Baek, Sarjentu Jeong Joong Kim, Sarjentu Hee Choi. *Jos

Leave a Reply

Your email address will not be published.