PR Horta Husu Joven Sira Soe Droga, Violensia, Alkohol

Naunil Media (Díli), Prezidente Repúblika (PR), José Ramos Horta husu ba joven sira atu soe droga, violensia, alkohol tanba Timor-Leste (TL), estadu frazil nune’e perigu droga tama iha ne’e, maibé sosiedade ladún tentasaun ba droga.

“Timor-Leste estadu frazil ita bele hateten frazil nafatin ne’e duni perigu para sira tama iha ne’e, mas pur enkuantu di’ak ita nia sosiedade ladún tentasaun droga, purtantu nu’udar Prezidente, nu’udar líder nasionál ha’u sei ko’alia ba joven sira soe droga, soe alkohol, soe violensia kuidadu ho droga, mas pur enkuantu problema ladún boot ida”, dehan Xefe Estadu ba jornalista sira iha Embaixada Thailandia, Farol, Segunda, (15/08).

PR mós ladún preokupa ho droga maibé sempre preokupa mak hakarak haree Timor-Leste moos husi droga no laiha droga, tanba problema droga ne’e rai ne’ebé organizada mós la konsege taka problema ne’e.

“Primeiru ha’u ladún preokupa ho ida ne’e klaru preokupa sempre ha’u hakarak haree Timor-Leste moos no laiha droga, maibé ladún preokupa tanba ha’u hatene que problema droga ne’e iha rai ne’ebé organizada tebe-tebes hanesan Europa lakonsege taka problema ne’e, Amérika suku potensia númeru um lakonsege tan, Singapura lakonsege, Indonézia lakonsege difisil tebe-tebes”, katak PR

Prezidente Repúblika mós akompaña kestaun ne’ebé akontese iha loron hira liu ba, mas ne’e pertense ba polísia, poder judisial kuandu elementu ruma sé se ne’e krime droga, hotu-hotu hatene iha Timor-Leste ne’e krime, iha ASEAN tomak krime, iha mundu krime ne’e sei iha konsekonsias, dehan PR Ramos

Xefe Estadu hateten,  Bainhira Timoroan ruma involvidu karik unika buat ida ke guvernu bele halo mak ne’e de’it fo apoiu konsular, iha ema seluk involve iha rai laran tuir Timor-Leste nia lei rasik. *Jos