KM Aprova Projeitu Dekretu Lei, Kria Estrutura Organiku INAP
Naunil Media (Díli), Ministru Prezidensia Konsellu Ministru (MPKM), Fidelis Manuel Leite Magalhães hala’o sorumutuk iha Palásiu Governu, aprova ona projeitu dekretu Lei kona-bá alterasaun dahuluk ba dekretu Lei nú.15/2017, loron 17 fulan-Maiu, ne’ebé kria no define estrutura orgánika Institutu Nasionál Administrasaun Públika (INAP) nian.
“Konsellu Ministrus hala’o sorumutuk aprova ona projeitu Dekretu-Lei, ne’ebé aprezenta husi Ministru Prezidénsia Konsellu Ministrus, Fidelis Manuel Leite Magalhães, kona-bá alterasaun dahuluk ba Dekretu-Lei nú. 15/2017, loron 17 fulan Maiu, ne’ebé kria no define estrutura orgánika Institutu Nasionál Administrasaun Públika nian (INAP)”, Hatete Ministru PCM Fidelis Magalhaes ba Jornalista sira hafoin reuniaun KM iha Palásiu Governu, Kuarta (17/08).
Governante ne’e hateten, Objetivu atu halo di’ak liu tan funsionamentu INAP nian, fó liu mós autonomia rasik ba INAP hodi nune’e sira bele Ezerse duni sira nia funsaun, hanesan institutu ida ne’ebé mak iha knaar atu fó kapasitasaun ba funsionariu sira Iha ambitu no área administrasaun públika nian, dehan nia.
“Ida ne’e importante tanba hanesan ne’e mak ita bele hadia kualidade kuadrus sira nian, no funsionariu sira nian iha administrasaun públika iha ita nia rain, iha tempu médiu nia laran, tinan sanulu oin mai no mós aban bainrua ba futuru”, katak nia.
Tanba ida ne’e iha INAP ida ne’ebé mak bele hamriik ho metin hanesan instituisaun ida, administrasaun públika nian sei difisil tebes atu ita bele iha administrasaun públika ne’ebé mak kompetente, nia hateten.
“Ho diploma ne’e, hakarak atribui ba institutu públiku ne’e, tuir Programa Governu nian, responsabilidade bo’ot ba nivel formasaun ne’ebé kualifikada ba rekursu umanu iha Administrasaun Públika, liuliu hodi fó programa sira lideransa nian no programa kapasitasaun avansada iha Administrasaun Públika”, tenik nia.
Nune’e, misaun foun INAP nian ba nivel formasaun profisionál iha Administrasaun Públika, ne’e hakarak reforsa formasaun profisionál hanesan instrumentu estratéjiku modernizasaun no transformasaun ba Administrasaun Públika, liuhusi estabelesimentu área estratéjika sira ba formasaun, hakotu nia. LTS
