EUA Apoia $ 600,000 Hodi Luta Hasoru Covid-19 Iha TL
Naunil Media (Díli), Ohin Estadus Unidus Amérika (EUA), liu husi Ajénsia Estadus Unidus ba Dezenvolvimentu Internasionál (USAID), anunsia finansiamentu adisionál $ 600,000 hodi finansia USAID nia atividade, ba Sustentabilidade Sistema Saúde hodi apoia luta hasoru Covid-19 iha Timor-Leste.
Enkaregadu Negósiu Embaixada Estadus Unidus Amérika (EUA)Tom Daley hatete, Fundu ne’e sei fó apoiu ba kontinuasaun servisu esensiál saúde inan, kosok-oan sira nian, no saúde labarik nian iha nasaun laran tomak hodi reforsa seguransa saúde.
Fundu adisionál $ 600,000 ne’ebé finansia husi USAID nia sistema sustentabilidade sistema saúde ne’e sei permite apoiu ba Ministériu Saúde ba munisípiu rua, husi apoiu ne’ebé fó ona ba munisípiu Ermera, Bobonaro, Liquiçá, no Ainaro. Orsamentu ida ne’e, nu’udar aumentu ida ba fundu millaun $1 ne’ebé entrega no anunsia ona iha fulan Setembru 2021 ba atividade hanesan”, dehan Enkaregadu Negósiu Embaixada EUA, Tom Daley bá jornalista sira iha Palácio de Cinzas, kinta (18/08).
Nia hatutan, Parabens ba progresu ne’ebé Timor-Leste hetan ona to’o oras ne’e iha kombate hasoru pandemia ne’e. Tanba, ohin loron nian bazeia ba progresu ne’e, atu haluan tan kobertura vasinasaun ba área balun ne’ebé remota liu iha nasaun ne’e.
“Liu husi kampaña sensibilizasaun espesífika ba sira ne’ebé seidauk bele simu vasina Covid-19 nian”, katak nia.
Iha fatin hanesan Ministra Saúde, Odete Freitas Belo informa, Ministériu Saúde apresia apoiu husi USAID, tanba sei reforsa servisu pesoál saúde sira iha munisípiu hotu inklui RAEOA, hodi responde ba pandemia Covid-19 no hasae partisipasaun komunidade sira nian iha kampaña vasina Covid-19.
“Dezde pandemia ne ‘e hahú, Estadus Unidus Amérika serbisu hamutuk ho Governu Timor-Leste hodi fornese liu millaun $ 7.4, iha asisténsia krítiku atu kombate Covid-19 inklui vasina Pfizer liu 200. 000”, nia sublina.
Estadus Unidus agora daudaun hela abordajen abranjente ida hodi hapara pandemia ne’e iha mundu tomak, hodi hamenus impaktu husi Covid-19 ba ema no sosiedade no hametin rekuperasaun globál, hakotu nia. Ana
