PR-ZBGMA Diskuti Lori Joven Ba Servisu Iha Brunei
Naunil Media (Díli), Prezidente Repúblika (PR) ho delegasaun Zamancartel Berhad Group Manpower Agency (ZBHMA) diskuti lori joven timoroan sira atu ba servisu iha Brunei no mós sei halo investimentu iha Timor-Leste (TL).
Lia hirak ne’e haktuir husi Embaixadór Timor-Leste ba Brunei Abel Guterres ba jornalista sira hafoin hamutuk ekipa remata enkontru ho Xefe Estadu José Ramos Horta iha palásiu Prezidensiál Nicolau Lobato Bairru Pite, segunda (22/08).
“Ohin ami mai hasoru malu ho sua excelensia Prezidente ko’alia kona-bá delegasaun husi Brunei ne’ebé mai atu haree kona-bá oinsá mak ita nia oan sira bele ba servisu iha Brunei, no mós ko’alia kona-bá investimentu iha rai laran ne’e, tanba ita presiza kria industria atu oinsá mak fó servisu ba ita nia ema iha timor laran”,dehan Embaixadór Abel Guterres
Diplomata ne’e hatutan, Kona-bá timoroan sira ne’ebé mak atu ba servisu iha Brunei, prosesu la’o dadaun ona bainhira aviaun mai foti sira mak ko’alia, no mós ema na’in hira ne’e iha prosesu no ema ne’ebé sai ne’e tenke assina kontratu mak sai.
“Área liuliu hospitalidade no mós iha buat sira seluk tan mas hospitalidade mak primeiru, tanba primeira vez ita hakat ba rai ida iha Azia ne’ebé ita nia ema atu servicu ba, ne’ebé ita sei tetu halo didi’ak para sasán hotu la’o di’ak, ne’ebé agensia sira ne’ebé lori ita nia ema ba tenke kuidadu sira to’o sira ba iha ne’ebá tinan-2 fila fali mai laiha problema ida ne’e mak ita hakarak, ne’ebé prosesu ne’e sei la’o hela”, katak Diplomata
Nia dehan, Hanesan liafuan de’it fó hatene lalika ko’alia barak bainhira sasán la’o ona mak halo festa, tanba hatene joven sira atu servisu.
Delegasaun husi Brunei ne’e mós ko’alia ho Prezidente Repúblika, kona-bá investimentu iha industria oi-oin hanesan halo fabrika, turizmu, hotel para fó servisu ba ema atu servisu iha hotel, iha restaurante, fabrika halo roupa. Industria sira ne’ebé que bele tau ema barak servisu ida ne’e mak Timor-Leste presiza, hakotu nia.*Jos
