Governu Aprova U$220.732,00 Ba Atividade Kardiál Dom Virgílio
Naunil Media (Díli), Ministru Internu Konsellu Ministru Rui Augusto Gomes informa, Konsellu Ministrus aprova ona projetu Rezolusaun Governu, ne’ebé aprezenta husi Ministru Finansas, kona-bá apoiu finanseiru U$220.732,00 ba realizasaun atividade resesaun no komemorasaun ba elevasaun Dom Virgílio do Carmo da Silva,SDB, hanesan Kardeál.
“Aprova ona finanseiru ho valór hamutuk U$220.732,00, ba realizasaun atividade sira ne’ebé refere, mai husi dotasaun ba governu tomak, no hafoin selebrasaun uluk akordu subvensaun públika entre governu no Konferénsia Episkopál”, dehan Ministru Internu Konsellu Ministru Rui Augusto Gomes ba jornalista sira iha Palásiu Governu, kuarta (24/08).
Governante ne’e hatutan, Governu valoriza signifikativu jestu ida ne’e, husi prezensa no importánsia Igreja Katólika nian iha sosiedade timoroan no asosia iha momentu moris koletiva ida ne’e.
“Tanba nee, hodi apoia no komemora atividade resesaun Dom Virgílio do Carmo da Silva, hanesan kardeál timoroan dahuluk,” katak nia.
Elevasaun Dom Virgílio do Carmo da Silva ba Kardeál sei hala’o iha konsistóriu loron 27 fulan Agostu tinan 2022 iha Roma Vaticano, hakotu nia. Ana