FEATUREDGeralIkus LiuNews

Joselino Konsidera Governu Loke BG Iha Loron Falintil, Jerasaun Foun Lahetene Istória TL

Fahe Tutan

Naunil Media (Díli), Ativista Estudante Universidade Díli (UNDIL),  Fakuldade Direitu, Departamentu Siénsia Direitu, Joselino Costantino Pereira, konsidera governu loke bola gulin iha loron Falintil, jerasaun foun lahatene ona istória Timor-Leste.

“Loloos loron boot sira hanesan ne’e loke filmajen sira ba joven sira no mós loron boot líder Polítiku sira tur hamutuk konta istória ba joven sira ne’e mak importante teb-tebes, la’ós loron boot ita autoriza fila fali loke Bola Guling no Futu Manu fatin-fatin tanba ne’e edukasaun ladiak ba sidadaun sira”, dehan  ativista estudantil Joselino Costantino Pereira ba Naunil Média via Whatsapp foin lalais ne’e.

Nia hatuta, Edukasaun ida ne’ebé mak atu fó ba ita nia joven sira ita nia inan aman sira edukasaun ida ke ladiak tanba hahalok sira hanesan ne’e bele kontribui violensia iha uma laran, tanba dala ruma balun joga nia sente katak nia osan laiha ona problema sira ne’e mai relata ba família ikus mai hamosu violensia domestika iha uma laran.

“Entaun meus saida mak ita nia estadu ida ne’e presiza halo tuir loloos, ita nia estadu ida ne’e labele husik de’it ita nia sidadaun sira maka kada loron banati lei sira, kada loron banati líder polítiku sira maibé, tuir loloos líder polítiku mós tenke hatene sira nia aan tanba rai ida ne’e eziste mós ho lideransa sira, lideransa sira mak banati prinsipál kona-ba ita nia lejislasaun hotu-hotu ne’ebé eziste iha ita nia rai ida ne’e liuliu ita nia Konstituisaun RDTL,” haktuir akademista.

Tanba ema hotu iha konstituisaun no lei nia okos nune’e líder polítiku hotu labele husik leet de’it atu sidadaun sira mak banati, maibé líder polítiku, governu, membru PN no mós líder boot sira mak tenke banati uluk hodi hatudu ezemplu di’ak ba jerasaun tuir mai, dehan nia.

Nia hateten aban bainrua atu ba ukun rai ida ne’e la’ós ba ho kakutak joga door Bola Guling la’ós ba ho kakutak futu manu, tempu pasadu Futu Manu maibé agora ko’alia kona-ba konstrusaun ba dezenvolvimentu Nasionál presiza prepara joven sira ho rekursu ida ne’ebé potensializadu.

“Ita presiza prepara nune’e iha futuru mai karik nasaun ida ne’e ninia destinu ita labele iha duvidas ba joven sira, tanba ne’e mak ita presiza teb-tebes ita nia estadu ida ne’e liuliu ba líder sira, governante sira ne’ebé asumi kargu iha orgaun ezekutivu labele uza ita boot sira nia knaar hodi manten ita boot sira nia arogansia ba iha situasaun sira hanesan ne’e”, katak nia

Ho nune’e polítiku, governante sira bele hatudu ezemplar ne’ebé di’ak ba joven sira, ne’e mak pertinente teb-tebes tanba, se lakohi konta istória ba joven sira maka futuru mai istória sira sei lakon mezmu nune’e livru la’ós sasukat maibé presiza konta husi ibun ba ibun pensamentu ba pensamentu ne’e mak mais konkretamente, nia sujere.

Tanba livru loron ida sei lakon nune’e presiza teb-tebes joven sira hatene istória, hodi aban bainrua ukun nasaun ne’e nafatin banati tuir istória sira ne’ebé pozitivu no mós istória sira ne’ebé hasoru sofrimentu oioin iha tempu pasadu nian, Nia hakotu. *Jos

Leave a Reply

Your email address will not be published. Required fields are marked *