Miguel Pereira Aumenta Sentru Votasaun Sei Fó Impaktu Ba Orsamentu

Naunil Media (Díli), Ministru Administrasaun Estatal (MAE) Miguel Pereira de Carvalho hateten parte sira iha planu atu aumenta sentru votasaun no estasaun de votus iha territóriu nasionál ne’e, sei fo impaktu ba orsamentu maibé nia vantajen mak aumentu taxa partisipasaun.

Membru VIII Governu Konstitusionál hato’o lia hirak ne’e ba jornalista sira hafoin remata enkontru ho Prezidente Repúblika (PR) José Ramos Horta iha Palásiu Prezidensiál Nicolau Lobato Bairru Pite, sexta (26/08).

“Planu ha’u ko’alia Sekretariadu Tekniku Administrasaun Eleitoral para sei aumenta sentru votasaun ne’e husi 1.200 ba 1.500 no estasaun de votus ne’e aumenta husi 1.500 ba 1.900 ne’e aumenta deit 30% de sentru votasaun no estasaun de votus. Ha’u fiar aumentu númeru ida ne’e sei iha impaktu orsamental mas nia vantajen mak ne’e urnas sira besik liu ba ita nia votantes sira ida ne’e bele kontribui ba aumentu de taxa partisipasaun, porque taxa partisipasaun eleisaun prezidensiál foin dadauk ne’e primeiru volta ne’e 77% ke barak liu kompara ho eleisaun 2017 infelizmente iha Segunda volta nia tun fali ba 75%,” dehan membru governu.

Nia hatutan, Tanba governu nia planu ne’e atu garante ema barak liu tan partisipa iha eleisaun atu garante ida ne’e mak aumentu sentru votasaun no estasaun de votus para hakbesik urnas ne’e ba iha eleitores sira no Guvernu hanoin katak presiza estabelese tan sentru votasaun no estasaun de votus barak liu tan para hakbesik urnas ne’e ba eleitores sira.

“Iha eleisaun prezidensiál foin dadauk ne’e ita estabelese de’it sentru votasaun 1.200 no estasaun de votus 1.500, guvernu hanoin katak atu aumenta tan sentru votasaun atu nune’e bele besik ba iha sentru de votasaun sira atu nune’e permite povu barak liu ba vota i bele hasae taxa partisipasaun,” tenik Miguel Pereira.

Miguel Pereira hateten, Eleisaun parlamentár governu liu husi Sekretáriadu Tékniku Administrasaun Eleitoral halo preparativu sira para atu organiza eleisaun parlamentár nian, ne’ebé nia data eleisaun konforme Konstituisaun no mós konforme lei eleitoral eleisaun parlamentár nian ne’e sé mak deside, PR depois konsulta ho governu no mós konsulta ho partidu polítiku ne’ebé mak reprezenta iha Parlamentu Nasionál.

Membru governu ne’e esplika STAE halo servisu preparativu sira iha tempu ida agora dadauk ne’e, hahú ona halo autorizasaun baze de dadus no resenseamentu eleitoral faze primeiru nian sei termina iha Novembru tinan ida ne’e. No iha fulan Dezembru sei kontinua ho aktualizasaun sira seluk no Janeiru to’o fali Maio mak sei kontinua ho aktualizasaun baze de dadus no resenseamentu eleitoral foun ne’e la’ós de’it iha rai laran no mós rai li’ur.

Aleinde ne’e STAE mós halo preparativu sira aktualizasaun baze de dadus no resenseamentu eleitoral, no mós sosa Ekipamentu adisionais sira ke hanoin presiza tan parake atu realiza eleisaun. No Governu preparadu para atu realiza eleisaun parlamentár ne’ebé maka previstu iha meadu tinan 2023. *Jos