PM Taur: Husu IGE,IP Loke Dalan Ba UPF Iha Fronteira
Naunil MEdia (Díli), Primeriu Ministru (PM) Taur matan ruak nu’udar mos Ministru Interior (MI), Husu ba Institutu Gestaun Ekipamentu Instituisaun Públiku (IGE,IP) servisu Hamutuk ho Ministeriu Obras Públika (MOP), Atu loke dalan ba Unidade Polísia Fronteira (UPF) iha fronteira.
“Iha tinan kotuk ha’u rasik husu Ministeriu Finansas atu tau osan, Aliende ajuda komunidade sira, maibé tenke konsentra mós ba iha fronteira para Postu hotu-hotu UPF nian, estrada tenke tama”, dehan PM Taur iha serimonia entrega ekipamentus Pezadu ba IGE,IP iha Kolmera, segunda (29/08).
Nia dehan, UPF sira iha fronteira servisu di’ak los ba nasaun, tanba ne’e sira nia asesu ba kondisaun estrada tenke ho di’ak.
“Entaun postu UPF Barak iha ona, maibe balun seidauk iha, ha’u mos husu apoiu ba iha IGE atu fasilita Ekipamentu Pezadu sira ba fronteira hodi loke estrada”, katak nia.
Nia hato’o mós ba Ministériu Obras Públiku (MOP) atu hamutuk ho IGE hodi tau matan mos ba UPF sira iha fronteira.
Hatan ba ne’e, Prezidente Institutu Gestaun Ekipamentu (IGE,IP) Ermenegilda da C. Laurentina hateten, Tinan kotuk IGE,IP nian loke ona dalan iha fronteira iha UPF nian.
“Ami to’o iha ne’ebá iha fatin rua mak ami seidauk konsege loke dalan, tanba sei iha hela prosesu iha MNEK katak, iha situs balu ne’e hanesan sensitivu ituan ne’ebé ami halo liña kordenasaun los tiha, fo espasu ba IGE foin bele tama ba loke”, nia dehan.
Maibé nia relata, iha sorin seluk ne’ebé hanesan iha livre para IGE bele loke dalan ami loke hotu ona iha Cova, Balibo nian. LTS
