PM Taur: Númeru Joven Aumenta Governu Lahia Kapasidade Fó Servisu
Naunil Media (Díli), Primeiru Ministru (PM), Taur Matan Ruak hateten Governu esforsu hodi kria kampu servisu iha rai laran, maibé tinan-tinan númeru joven kontinua aumenta nune’e governu labele fó servisu ba hotu-hotu.
“Ita halo esforsu primeiru hadia ita nia situasaun iha rai laran, para bele kria servisu, maibé ho númeru joven ne’ebé kada tinan aumenta ita laiha kapasidade para fó servisu ba hotu-hotu, maibé ita sei halo esforsu para fó servisu ba sira ne’ebé bele,” dehan Xefe Guvernu ba Jornalista sira hafoin remata enkontru semanal ho Prezidente Repúblika (PR), José Ramos Horta iha Palásiu Prezidensiál Nicolau Lobato Bairru Pite, Kinta (01/09).
Xefe Ezekutivu ne’e hatutan, Dezenvolvimentu iha Timor-Leste ne’ebé hanesan tinan-5 oin mai halo investimentu ba sidade Díli de’it kuaze besik 1 biliaun, hanesan Bee no saneamentu no mós projetu sira iha fatin seluk.
“Segundu para ida ne’e ita dezenvolve ita nia rai ne’e, ita bo’ot sira hatene ita iha tinan-5 mai oin so iha sidade Dili ne’e de’it kuaze besik 1 biliaun de dolares de investimentu, Aeroportu besik juta 300 resin ita assina ho MCC Estadus Unidus da Amérika 484 miloens dolares ne’e ba Díli Bee, Saneamentu, Ita ho banku Aziatiku, ADB, purtantu banku dezenvolvimentu Aziatiku, Banku mundiál ne’e kuaze 200 ital miloens ne’e iha kuaze 1 biliaun de dolares, aleinde ida ne’e ita iha projetu fatin sira seluk tan,” katak PM.
Taur hateten mezmu hanesan ne’e Timor-Leste sei laiha kapasidade para fo servisu ba joven sira hotu, tanba ne’e Timor-Leste negosia ho Austrália kada vez mais aumenta númeru para ema ba iha Austrália, no dadaun ne’e negosia mós Japaun, Brunei Darusalam, média Oriente iha fatin-fatin ke sira presiza.
Tanba ne’e Timor-Leste presiza hadia sentru formasaun sira para ke ema sira kuandu ba nen iha skill ida tanba pratikamente agora ho kapasidade formasaun mós menus loos tanba ne’e joven sira ba ne’e bolu dehan Inskill sira nia skill laiha.
Xefe orgaun Ezekutivu ne’e esplika mas ne’e lá’os servicu ida ke fasil ne’e todan, mas guvernu naturalmente halo esforsu hotu parake kria kondisoens liu-liu atrai seitor privadu, hanesan iha tempu badak ne’e simu emprezariu sira mai husi Austrália, Brunei no selu-seluk komesa manifesta sira nia interese atu mai investe iha Timor-Leste, ne’e sinal di’ak no sinal pozitivu.
Eis Prezidente Repúblika ne’e mós espera katak hadia ambiente Timor-Leste parake atu atrai tan seitor privadu para ajuda kria empregu iha rai laran, tanba guvernu labele fo servisu, iha fatin hanesan la’ós guvernu mak fó servisu seitór privadu mak fó servisu ba timoroan sira, maibé governu tenke halo mak hadia ambiente negósiu ne’e importante loos no agora dadaun governu halo hela esforsu sira ne’e para mellora uituan atrai investidór sira mai Timor-Leste. *Jos
