Tempu Badak Vizita Austrália, PR Horta Rona Opiniaun F-FDTL

Naunil Media (Díli), Iha tempu nia laran Prezidente Repúblika (PR) José Ramos Horta sei halo vizita ba Austrália, tanba ne’e rona opiniaun husi Falintil Forsa Defeza Timor-Leste (F-FDTL), nian nune’e bele hatutan iha Austrália.

Kestaun ne’e hato’o husi Xefe Estadu Maior General Forsa Armada Tenente General Falur Rate Laek ba Jornalista sira hafoin enkontru ho Xefe Estadu iha palásiu Prezidensiál Nicolau Lobato Bairru Pite, sexta (02/09).

“Aktualiza situasaun aktual forsa ninian, depois assuntu kritiku sira ne’ebé iha instituisaun F-FDTL nia laran, i Prezidente husu ami nia opiniuan, ami nia hanoin para depois bainhira tempu badak ba iha Austrália ne’ebá karik nia bele hatutan de’it iha ne’ebá,” dehan Tenente General Falur Rate Laek

Iha enkontru ne’e Falur Rate Laek mós aprezenta assuntu kritiku sira liu-liu iha komponente Naval ne’ebé laiha meus, tasi boot, susar ba manutensaun nune’e buka oinsá atu koopera nasaun vizinu sira.

“Assuntu kritiku liu-liu kona-bá assuntu Naval nian, meus ne’ebé patrolha Naval nian ita laiha, ita nia tasi bo’ot, agora manutensaun susar buat sasán ne’e hotu ne’ebé ita tenke halo oinsá para koopera ho país vizinu sira para ita halo patrolha konjunta hamutuk ka oinsá ne’e modelu ida ne’e,” katak Falur Rate Laek

Tenente General ne’e hateten Ró rua husi Austrália iha tinan 2023 mak mai, foin dadauk fulan Jullu ne’e Falur Rate Laek ba halo lansamentu primeiru pedra iha sidade Perth ho Konpaña Austrália ne’ebé fabrika Ró ahi ne’e.

Nia esplika Portu Naval Hera dadaun ne’e Austrália mak halo, no mós manutensaun ba Ró Naval ne’e lá’os Nia mak kaer, maibé ne’e Ministeriu Defeza mak halo konkursu, mas Nia rona dehan konkursu balun manán ona, balun seidauk manán ka seidauk anunsia atu repete fali liu-liu kona-ba rampa Behau nian ne’e, Konpaña foti tiha dokumentu lahatama fali ne’ebé sira sei halo re-tenderizasaun.

Nia dehan Airoportu Baucau nian agora iha hela manutensaun nia laran, no treinamentu nokapasitasaun nune’e ekipamentu ne’ebé ema fo sira sei uza, ne’ebé agora sira iha ne’ebá. Konstrusaun fiziku ne’e agora la’o di’ak hela, buru hotu ona, sei halo manutensaun ba infrastrutura para alozamentu forsa nian.

Iha biban ne’e nia mós haktuir katak kona-bá rekrutamentu ne’e dia 11 inkorporasaun orsida Nia ba assina ona para dia 11 ne’e inkorporasaun tama ona iha sentru formasaun treinu, hamutuk 600 pessoas. *Jos