Estudante Octavio:  Presiza Hadia Sistema Edukasaun Iha TL

Naunil Media (Díli), Estudante Universidade Dili (UNDIL) Octavio Luis hateten, Presiza hadia sistema edukasaun iha Timor-Leste (TL), nune’e transforma ema hotu tenke hanoin konstrutivu no hanorin povu sai ema ne’ebé intelektual no kritiku.

“Entaun saida mak ita presiza halo? Presiza hadia sistema hirak ne’e liuliu parte edukasaun ninian, presiza kontrola masimu i presiza hadia tan sistema edukasaun para depois transforma ema hotu-hotu tenke iha hanoin ida ne’ebé mak di’ak no konstrutivu, no hanorin povu ida ne’e sai ema ne’ebé mak intelektuais, no sai kritiku,” dehan Octavio Luis ba Naunil Media via Whatsapp, foin lalais ne’e.

Nia  ne’e hatutan, Hanorin povu ida ne’e liu-liu joven sira oinsá mak bele lori sira sai husi hahalok ida brutalizmu ka bandalizmu nian, entaun parte edukasaun mós presiza tau atensaun masimu hodi bele kontrola.

Nia hateten, Iha Timor-Leste iha lei rasik dala barak ema intrepreta sala dehan lei laiha forsa, lei ne’e hanesan buat ida karik lei objetu maten ida, hakarak atu lei ne’e siak, hakarak atu lei ne’e rigorozu presiza. Tanba ne’e ema ne’ebé mak implementa lei ne’e implementa ho honestu no tratamentu lei hirak ne’e ba povu tenke halakon tiha interese individu ka interese familiarizmu.

“Ita implementa lei presiza implementa ho justu atu nune’e tratamentu ba ita nia povu ne’e ho dignu no justu ba ita nia povu ne’e, ida ne’e mak ita hanaran justisa. Tanba ne’e buat hirak ne’e ita presiza hadia,” katak nia

Tanba ne’e nia mós rekomenda ba ema sira ne’ebé mak aplika ka implementa lei ne’e ho honestu no halakon interese individu, maibé tau interese komún ba lei atu nune’e tratamentu ne’e hanesan no justu ba povu ne’ebé iha estadu ida ne’e.*Jos