FEATUREDGeralIkus LiuNews

FONGTIL Husu Arte Marsiais Hapara Ona Problema Iha Povu Nia Leet

Fahe Tutan

Naunil Media (Díli), Porta Voz Ofisial Advokasia Forum ONG Timor-Leste (FONGTIL) Jorge Madeira nia parte husu ba arte marsiais no rituais sira hapara ona problema iha povu nia leet.

“Husu ba sua exelencia Sekretáriu Estadu Juventude no Desportu ho Kram atu bolu atensaun ne ebé seriu no Rigor ba Responsavel Organizasaun sira  atu orienta nia membru sira atu labele halo problema oioin”, dehan Jorge Medeira ba jornalista sira iha salaun FONGTIL Kaikoli, segunda (12/09).

Nia hatutan, problema lubuk ida hanesan Joven ida mate iha sela PNTL Kaikoli tuda – malu entre grupu ( maioria juventude ) iha Bidau, Audian no Vila Verde, sai preokupasaun husi públiku no hamosu ona perturbasaun ba Orden Públiku no la obdese ba Konstituisaun RDTL Artigu 146 no 147.

“FONGTIL no nia Rede Organizasaun Sosiedade Sivil ( OSS ) bolu atensaun ba Governu oinsa bele buka solusaun ba Problema sira ne’ebé akontese bebeik iha Kapital Díli”, katak nia.

Problema sira ne’e, mosu nia abut mai husi governu rasik tanba la kría kondisaun di’ak ba joven sira, jovem barak mak moris iha kiak , servisu la iha, ne’ebé a’as tanba menus kampu servisu  iha Timor-Leste, nia prokupa.

Nia hateten governu presiza kria kampu sevisu ba joven Timor-Leste, nune’e hamenus ona problema iha rai laran.

“Husu ba governu atu labele garantia de’it ba Austrália no Koreia mak fö servisu ba joven sira iha Timor-Leste, maibé tenke investe ona iha poliítika estratejiku ba futuru joventude sira nian liuhusi investimentu ba iha edukasaun ,no kria kampu servisu ba joventude sira, atu nune’e joven sira la monu ba hanoin no hahalok violensia nian”, nia halotu. Ana

Leave a Reply

Your email address will not be published. Required fields are marked *