Ana Paula: Presiza Iha Formasaun Ba Autór Judisial

Naunil Media (Díli), Diretora Ezekutiva Judicial System Monitoring Programme (JSMP), Ana Paula Marçal hateten,  Tribunal presiza iha formasaun ba autór judisial sira nune’e bainhira lori kazu ba iha Tribunal desizaun tenke justu ba ema hotu.

“Durante ami eziste too agora no ami halo monitorizasaun regularmente ba iha Tribunal sira la’ós Tribunal Dili de’it, Tribunal rekursu no mós Tribunal jurisdisaun haat ne’e hotu ami haree katak presiza iha formasaun ne’ebé adekuadu liu tan ba iha ita nia autór judisial sira atu nune’e bainhira foti desizaun, bainhira halo akuzasaun klean duni tuir duni kazu nia gravidade ka tuir duni provas ne’ebé iha entaun bainhira lori kazu ba iha Tribunal desizaun ne’e tenke justu ba ema hotu,” dehan ezekutiva JSMP ba Jornalista sira iha Colmera, Kuarta (14/09).

Ana Paula hatutan, Durante JSMP observa bainhira halo prosesu julgamentu liu-liu ba vitima minor, tanba ne’e sira husu nafatin ba autór Tribunal sira atu bele sensivel labele halo tratamentu hanesan kazu sira seluk mas ida ne’e maneira ne’ebé diferente tanba labarik influénsia fiskolozia ne’e liu atu nune’e sira bele halo tratamentu ida espesifiku liu ba labarik sira.

Ezekutiva JSMP ne’e esplika intermus lingua durante sira nia observasaun iha dezafiu lubuk ida iha ne’ebá tanba língua ofisiais ne’e iha rua tetum ho Portugés no arguidu, ka Testemuña dala balun mós mai husi lian ne’ebé diferente hanesan ho lian Ingles, China, mandarin no mós lian matéria, ida ne’e seidauk iha tradutor ne’ebé espesifiku entaun ida ne’e difikuldade.

Nia dehan dala ruma seitor justisa sira tenke buka fali tradutor naun ofisiál ne’ebé ke dala ruma susar atu hetan no tenke hadia julgamentu, tanba ne’e sira husu Tribunal rekursu no ministeiriu justisa atu bele halo rekrutamentu se lae la’ós halo rekrutamentu mas halo MoU ida ba ema sira ne’ebé hetene ona bele ajuda iha língua, ne’e bele iha kontratu ida ba sira para iha formasaun tanba buat ida termu juridiku ne’e lá’os fasil. *Jos