Embaixador UE Foun Entrega Karta Kredensial, PR Husu Kontinua Apoiu TL

Naunil Media (Díli), Embaixador foun husi Uniaun Europeia (UE) entrega Karta Kredensial ba Prezidente Repúblika (PR) José Ramos Horta, no Xefe Estadu husu Uniaun Europeia kontinua apoiu Timor-Leste (TL).

Lia hirak ne’e hato’o husi Vice Ministru Negósiu Estranjeiru Kooperasaun (MNEK), Julião da Silva ba jornalista sira hafoin akompaña Prezidente Repúblika simu Karta Kredensial husi Embaixador UE iha Palasiu Prezidensiál Nicolao Lobato, Bairo Pite, Sesta (16/09).

“Ohin depois de entrega karta kredensiál, iha enkontru bilateral ho señor Prezidente Repúblika, husu atu kontinua apoiu Timor-Leste, no mós sua exselensia señor Prezidente Repúblika husu atu servisu hamutuk ho ita nia setor privadu atu dezenvolve no hasa’e kapasidade koñesimentu ita nia setor privadu sira,” dehan Vice MNEK

Membru VIII Guvernu Konstitusionál ne’e hatutan Prezidente Repúblika mós husu ba Embaixador foun liu husi Uniaun Europeia atu apoiu setor privadu sira hodi bele kompete iha merkadu internasional.

“Sua exelensia Prezidente Repúblika mós propoin atu husu ba Uniaun Europeia atu bele mós lori ita nia setor sira atu bele kompete ba iha merkadu internasional. liu-liu prepara adezaun Timor-Leste nian ba ASEAN,” katak Membru VIII Guvernu Konstitusionál

Vice MNEK hateten Xefe Estadu mós husu ba Embaixador Uniaun Europeia foun Marc Fiedrich atu redus fundus imprestimu ne’ebé fo ba Timor-Leste. No mós husu diplomata Uniaun Europeia ne’e kompromete atu kontinua promove turizmu Timor-Leste nian ba mundu, no mós apoiu adezaun Timor-Leste nian ba organizasaun mundiál komersiu.

Embaixadór Marc Fiedrich aprezenta karta kredensial, hodi substitui nia predesesor Andrew Jacobs ne’ebé mandatu remata ona iha fulan Jullu foin lalais ne’e.*Jos