Horta Ko’alia Ho Bilionariu Amérikanu Hodi Apoia Media Privadu Iha TL
Naunil Media (Nova Iorke), Prezidente Repúblika (PR) José Ramos Horta, hala’o enkontru ho Billionáriu Amerikanu, ne’ebé hanesan na’in ba fundasaun Open Society Foundation, Geroge Soros hodi apoia media Privada iha Timor-Leste (TL).
Tuir Xefe Estadu, Na’in ba Open Society Foundation, Geroge Soros hanesan Billionáriu ho idade tinan 90-resin ona, maibé iha kondisaun saúde di’ak, no mós influénsia iha mundu.
Prezidente Repúblika hatutan, delegasaun husi Open Society Foundation vizita ona Timor-Leste, hodi diskuti hamutuk programa espesiál ne’ebé fundasaun ne’e atu implementa, liu-liu feto iha negósiu, mídia no demokrasia iha mundu.
“Ha’u sei haree oinsá sira bele apoia mídia iha Timor-Leste, mais ha’u lakohi rona apoiu kona-ba “training”, tanba halo ‘training” tinan lubuk nia laran, ha’u hakarak haree apoiu konkretu ba mídia mak saida?, Favór tau osan ruma apoiu ba ekipamentu apoiu ba sede infraestrutura mídia sira-nian buat sira-ne’e. Portantu, buat barak ha’u sei ko’alia ho sira para haree oinsá señór Geroge Soros bele apoia Timor-Leste makas liu,” dehan liu husi Komunikadu ne’ebé Naunil Media assesu iha Prezidensiá Repúblika, Domingo (25/09).
Open Society Foundation hakarak apoia hadi’a infraestrutura husi instituisaun mídia privada sira.
“Klaru apoia ne’ebé ha’u buka ba mídia privadu, tanba mídia governu hanesan RTTL no seluk tan ne’e governu iha orsamentu, preokupasaun númeru 1 ba mídia privada, sira ne’ebé kleur ona hatudu sira-nia komitmentu mídia privada ne’ebé ho sira-nia rekursu rasik ho difikuldades ne’e inklui mós “online” par apoia mós “online”. Ba mídia privadu, ha’u buka atu apoiu husi governu ou fundasoens iha li’ur par ita-nia jornalista sira bele iha ekipamentu, iha infraestrutura ne’ebé di’ak liu par sira bele dezenvolve”, deklara Xefe Estadu.
PR Horta mós prontu atu buka apoiu ba nasaun seluk hanesan Koreia no seluk tan, hodi apoia mídia estatal hanesan RTTL.Ep, maibé kestaun ne’e tenke koordena ho governu, tanba instituisaun mídia iha papél importante hodi habelar informasaun.
Molok hala’o enkontru ho Na’in Open Society Foundation, Xefe Estadu sorumutu uluk ho Geroge Soros nia oan mane Alex Soros hamutuk ho eis Vise Primeiru-Ministru Inglaterra atuál CEO Open Society Foundation hodi ko’alia kona-ba ajenda enkontru ho Gerige Sorus nian.*Jos
