FEATUREDIkus LiuNewsPolitika

PR Horta-PM Nova Zelándia Jacinda  Diskuti Situasaun Internasional

Fahe Tutan

Naunil Media (Nova Iorke), Prezidente Repúblika (PR), José Ramos Horta hala’o enkontru bilateral ho Primeira Ministra (PM), Nova Zelándia Jacinda Ardern, hafoin partisipa iha Asembleia Jerál Organizasaun Nasoens Unidas (ONU) ba dala-77 iha Nova Iorke Estadu Unidus Amérika.

Iha enkontru ne’e mós partisipa husi Ministra Negósiu Estranjeiru no Kooperasaun (MNEK),  Adaljiza Magno no Embaixadór Timor-Leste ba ONU, Carlito Nunes, no seluk tan.

Enkontru entre Xefe Estadu José Ramos Horta ho Primeira Ministra Nova Zelándia ne’e ko’alia liu kona-bá situasaun internasionál, liu-liu kona-ba funu entre Ukránia ho Rússia ne’ebé fó impaktu ba mundu inklui, Timor-Leste.

“Ami ko’alia liu-liu kona-ba situasaun internasionál balun, klaru hotu-hotu ko’alia kona-ba problema boot iha Ukránia, tanba konflitu Rússia ho Ukránia ne’e impaktu ba mundu tomak inklui ba ita, através de problemas, sansoens, komérsiu internasionál hetan impaktu entaun folin sasán sa’e iha mundu, tanba ne’e mak impaktu ita diretamente, Timor-Leste nia pozisaun klaru ba ida-ne’e. Maibé, ko’alia mós kona-ba Myamar, ita labele ko’alia de’it kona-ba funu iha dok hanesan Ukránia, maibé la ko’alia kona-ba buat ne’ebé akontese iha ASEAN nia klaran hanesan Myanmar,” dehan liu husi Komunikadu ne’ebé Naunil Media assesu iha média Prezidensiá Repúblika, Domingo (25/09).

Horta mós konsidera, Relasaun bilateral Timor-Leste nian ho Nova Zelándia hanesan prioriodade nasionál, hanesan mós Austrália ho Indonézia no seluk tan.

“Ne’eduni relasaun bilateral ho Nova Zelándia ha’u konsidera hanesan prioridade nasionál importante hanesan ita-nia relasaun ho Austrália, importante hanesan ita-nia relasaun ho Indonézia no rai sira seluk hanesan Singapura. Maibé haree mós ba possibilidade Timor-Leste ho Nova Zelándia atu inkrementa liu-tán relasaun bilateral, ne’e mak ko’alia di’ak ho señora Primeira-Ministra Nova Zelándia”, katak Horta

Nia dehan, Maske Nasaun ne’ebé ki’ik no la viziñu ho Timor-Leste, PR Horta hateten, Nova Zelándia mós fó apoiu makas tebes ba Timor dezde iha tempu luta, tanba iha 1999 Nova Zelándia ho Nasaun sira seluk mak halo negosiasaun no mediasaun hodi hatama forsa INTERFET mai Timor-Leste. Nune’e mós iha krize 2006, Nova Zelándia kontinua apoiu forsa mai Timor-Leste hodi fó apoiu seguransa iha Timor. *Jos

Leave a Reply

Your email address will not be published. Required fields are marked *