ONU Sei Ko’alia Ho Nasaun G20 Apoiu TL Adere Ba ASEAN
Naunil Media (Nova Iorke), Sekretariu Jerál Organizasaun Nasoes Unidas (ONU), António Guterres promote atu koalia ho líder mundiál sira, inklui lider nasaun membru G20 hodi apoiu adezaun Timor-Leste (TL), bá Association of Southeast Asian Nations (ASEAN).
Prezidente Repúblika, José Ramos-Horta agradese ba apoiu hotu hosi ONU no nasaun membru ASEAN sira nia eforsu hodi simu Timor-Leste sai membru ASEAN ba dala 11.
Ba Xefe Estadu, António Guterres iha relasaun metin ho atuál Prezidente Indonézia, Jokowi, nune’e nia bele negosia hodi Timor-Leste adere lalais ba ASEAN.
“Sekretáriu Jerál ONU, António Guterres sempre prontu atu haré saida mak Timor-Leste presija nia apoiu, bele dala ruma apoiu diretamentu husi ONU maibé mós bele liu husi koalia ho líder sira iha mundu, favór tau matan ba Timor-Leste. Nia (António Guterres) relasaun metin ho Prezidente Repúblika Indonézia, Joko Widodo, nu’udár mós Prezidente ba ASEAN no G20 iha tinan 2023, ne’e duni ita presija buat ruma husi Sekretáriu Jerál ko’alia ho líder Europeiu sira no G20, nia prontu atu halo loby ba Timor-Leste, nia sempre rai Timor-Leste iha nia ulun no fuan,” dehan liu husi Komunikadu ne’ebé Naunil Media assesu iha Prezidensiá Repúblika, Tersa, (27/09).
Xefe Estadu konsidera, Sekretáriu Jerál ONU, hanesan ema ida di’ak tebes, líder ne’ebé iha kualidade no koñesidu hanesan ema relijiozu, nu’udár Katóliku dezde hanesan Primeiru Ministru Portugál, iha fuan di’ak tamba ne’e mak eleitu hanesan lideransa máximu ONU ho unanimidade tutuir malu.
Uluk iha tempu difísil 1999, hanesan Primeiru Ministru Portugál, António Guterres halo pressaun makas ba Prezidente Amerikanu, Bill Clinton no líder Europeiu sira atu buka konsensu iha Konsellu Seguransa ONU, nune’e Misaun Forsa Manutensaun ba Dame INTERFET tama iha Timor-Leste,nia haktuir.
Iha enkontru ne’e, Sekeretáriu Jerál ONU apresia mós Xefe Estadu foun Timor-Leste ba períodu 2022-2027, José Ramos-Horta.
Durante estadia iha Amérika, Prezidente Repúblika hasoru malu ona ho Primeiru-Ministru Kambodia, Hun Sen, no líder mundiál sira saluk hodi ko’alia mos konab prossesu Timor-Leste adere ba ASEAN.*Jos
