Ainaro Ho Bobonaro No Oe-Cusse Sei Halo Pagamentu Bolsa Da Mãe
Naunil Media (Díli), Tuir Diretór Jerál MSSI, Florensiu Pina Dias Gonzaga hateten, Iha programa bolsa da mae jerasaun foun bazeia ba dekretu lei 2/2021 ne’ebé hahú implementa tinan ne’e, iha Munisípiu Ainaru, Bobonaru no Oe-Cusse no programa refere atu redus ki’ak no mal-nutrisaun no haforsa ekonómia uma laran.
“Iha Oe-Cusse pagamentu la’o hela, tanba ita halo akordu ho Kompaña Telkomsel, agora iha munisípiu Bobonaru no Ainaru prosesu la’o hela no osamentu ita konta hela, ema nia direitu sei la lakon, maibé pagamentu la’o, tanba husi BNCTL katak, benefisiariu tenke iha BI no kartaun eleitoral “, dehan Diretór Jerál iha salaun Fokupers, kuarta (19/10/22).
Nia hatutan, Benefisiariu ba bolsa da mãe- jerasaun foun mak inan isin rua kada fulan $15, bebe idade 0-6 kada Fulan $20 no bebe moris defisiensia sei hetan $30 .
Nia esplika, Agora maioria benefisiariu iha Ainaru no Bobonaru seidauk bele loke konta bankaria, tanba dokumentus seidauk kompletu.
“Ita koordena ho Ministeriu Justisa espera katak iha tempu badak buat hotu-hotu resolve, pagamentu liu husi banco sei la’o benefisiariu sei hetan direitu “, tenik nia.
Nia dehan, Prosesu pagamentu iha failansu, tanba atraves husi banco nasional komersiu timor-leste, tanba persija dokumentu. “to’o agora ita sei iha faze diskusaun hela, bainhira dokumentus kompleta bele halo pagamentu, maibe dokumentus seidauk bele iha alternativu, maibé agora sei halo diskusaun, maibé iha alternativu atu hare kona-ba benefisiariu laiha rekening no seluk tan”, hakotu nia.
Bolsa da mãe jerasaun foun hamutuk 5.477 iha Rejiaun Administrtaiva Espesiál Oé-Cusse Ambeno (REAOA) sei simu subsídiu, semana ne’e, inan isin-rua 556 ho nia osan $8.340,00, labarik 4.905 ho nia osan $98.100,00 no labarik defisiénsia hamutuk na’in-16 ho nia osan $160,00. Enkuantu, Benefisiáriu Ainaro no Bobonaro nian to’o fulan Agostu hamutuk inan isin-rua 832, labarik 6.318 no defisiénsia 11. Gyor
