Kambodia Sai Alternativu Hodi Importa Foos Mai TL
Naunil Media (Kambodia), Prezidente Repúblika PR José Ramos Horta hateten bainhira krize bo’ot ruma nasaun seluk lakonsege halo exportasaun foos mai Timor-Leste (TL) Kambodia sai Alternativu hodi Importa Foos Ba Timor-Leste.
“Ministériu Ekonomia, Komérsiu no Indústria hatene oinsa Timor-Leste sosa no importa foos husi Kambódia, bele karun oituan maibé kualidade di’ák no garante fornesimentu alternativu tanba dala ruma iha krize bo’ot ruma, Vietname mós la konsege halo exportasaun ba ita, ne’e duni, Timor tenke diversifika rai ne’ebé importa foos nu’udár alimentu importante ba povu”, dehan Xefe Estadu no liurai Kambodia iha palásiu Real diskuti kooperasaun ekonómiku no komérsiu ne’ebé Naunil Media assesu iha Prezidensiá Repúblika, kinta (20/10).
Nia hatutan, Reinu Kambodia nu’udár Reinu antigu tebes, nia istória luta, terus mós hanesan Timor-Leste, tanba ne’e, sira simpatia maka’as tebes-tebes. Ohin ko’alia ho Liurai nu’udár ema artisita ida. Ohin, hanesan hakat ida husi diplomasia ho Kambódia ba tinan 20 nia laran.
Iha enkontru ne’e Prezidente Repúblika mós konvida Liurai Kambódia, Narodom Sihamoni atu vizita Timor-Leste.
“Buka mós investimentu ho seitór privadu nasionál no internasionál bazeia iha Kambódia, buka sira nia investimentu iha área agrikultura no turízmu iha Timor-Leste. Primeiru-Ministru Hun Sen vizita ona Timor-Leste, ohin ha’u konvida mos Sua Majestade, Liurai Kambódia atu vizita Timor-Leste no Nia simu ho laran konvite ne’e”, informa Xefe Estadu.
Timor-Leste no Kambódia sei assina akordu kona-ba servisu aereo, hodi permite voo mensal husi Phnom Penh mai Díli, hodi fasilita passajeiru husi Xina mai Timor-Leste, tamba paíz ne’e jeográfikamente besik liu Xina.
Enkontru ne’e ko’alia mós kona-ba adezaun ba ASEAN, tamba Kambódia apoia adezaun Timor-Leste nia integrasaun ba organizasaun rejionál ne’e iha tinan 2023. Prezidente Repúblika mós sente kontente ho resepsaun vizita husi Aeroportu Phnom Penh to’o Otél. Tuir ajenda, Xefe Estadu sei hasoru malu mós ho senadu Reiñu Kambódia, entidade militár, seitór privadu no alta entidade seluk. *Jos
