Alkatiri-Horta Hamutuk Buka Solusaun Ba Timoroan Iha Portugál
Naunil Media (Díli), Eis Primeiru Ministru Marí Bin Amude Alkatiri ho Prezidente Repúblika (PR), José Ramos Horta hamutuk hodi buka solusaun ba timoroan sira ne’ebé iha Portugál, tanba iha loron 29 agora Xefe Estadu sei ba Portugál.
“Ita hotu hatene katak sua excelensia Prezidente Repúblika atu ba Portugál agora iha loron 29, ha’u nia Preokupasaun ba timoroan sira sidadaun Timor ne’ebé kontinua ba de’it-ba de’it Portugál ne’e bo’ot tebes, entaun ha’u mai para atu hamutuk ho señór Prezidente fó ha’u nia opiniaun atu rezolve buka solusaun ne’e halo nusa, ne’e mak ha’u husu ko’alia molok nia atu ba Portugál”, dehan Marí Alkatiri ba jornalista sira hafoin enkontru ho Xefe Estadu iha palásiu Prezidensiál Nicolau Lobato Bairru Pite, sexta (28/10).
Eis PM ne’e mós fó proposta ida ba Prezidente Repúblika hodi lori ba Portugál, atu ajuda fó solusaun temporaria ba timoroan sira ne’ebé dadaun ne’e iha Portugál, atu nune’e hahú fali prosesu ida bele fo solusaun permanente.
“Ami ko’alia hotu-hotu ha’u fó proposta i nia mós konkorda proposta ke ha’u fo ba ne’e lori ba Portugál ba para atu ajuda fo solusaun ida ke temporaria mas tenke iha solusaun, depois para atu hahú prosesu ida ke bele fó solusaun ida ke permanente, mas tenke iha solusaun purke ida ba toba iha jardim ne’e agora rai malirin komesa ona ne’e susar tebes ne’e mak ha’u nia Preokupasaun bo’ot agora”, katak eis PM
Alkatiri argumenta Proposta ne’e Prezidente atu lori ba Portugál se ko’alia ba média di’ak liu lalika ona, maibé liuliu para atu kria kondisoens para sira bele aprende buat ruma iha Portugál hahú ho língua portugeza, no servisu ruma ne’ebé sira hakarak halo iha ne’ebá sira tenke iha tiha oportunidade para atu hetan treinu ba buat hirak ne’e.
Nia dehan, Depois sira ne’ebé mak atu ba tan ne’e halo hanesan agora dadauk ba Korea do Súl ne’e fó uluk treinu iha ne’e, treinu língua, treinu professional depois hotu-hotu iha direitu atu ba ne’ebé de’it mas labele ba ema nia rai para atu sai fali refujiadu ba para atu kontribui lori sira nia kbiit sira nia kapasidade para atu hatudu katak Timor mós iha talentu. *Jos
