Kacific Iha Interese Fornese Internet Ba Área Remota
Naunil Media (Díli), Kontraktor Kacific iha interese atu halo servisu ida liuliu kona-ba fornesementu servicu internet ba iha area remota sira tanba Autoridade Nasionál Comunicação (ANC), prontu apoiu liu fornesementu lisensa espektu.
Kestaun ne’e hato’o husi Prezidente Konsellu Administrasaun ANC João Olívio Freitas ba Jornalista sira hafoin ho ekipa remata enkontru ho Prezidente Repúblika (PR) José Ramos Horta iha palásiu Prezidensiál Nicolau Lobato Bairru Pite, sexta (28/10).
“Tanba Kacific iha interese ida atu hala’o servisu liuliu fornesementu internet via satelit ba iha area remota sira i señór Prezidente haksolok tebes rona ida ne’e, i mós parte ANC ita hanesan regulador ne’ebé mak tau matan mós ba sira prontu atu apoiu nafatin Kacific liu husi fornesementu lisensa espektu la’o tuir prosedimentu ne’ebé mak ita iha durante ne’e,” dehan Prezidente ANC
Prezidente Autoridade komunikasaun ne’e mós hatutan sira parte iha prontidaun ba Prezidente Repúblika katak ANC prontu hala’o sira nia knaar tuir lei ne’ebé haruka, no mós hanoin ne’ebé Xefe Estadu hato’o ba sira.
“Ami hato’o mós ami nia prontidaun ba Prezidente katak ANC prontu nafatin atu halao ninia knaar sira tuir lei haruka no rona mós hanoin sira ne’ebé mak señór Prezidente hato’o atu nune’e bele halao servisu sira iha ANC lais no di’ak liu tan no mós bele serbí di’ak liu tan operadores sira no setor privadu sira seluk ne’ebé mak liuliu investe iha setor telekomunikasaun,” katak Prezidente Autoridade Komunikasaun
Nia hateten emprinsipiu Kacific rezistadu ona iha ANC hanesan operador agora faze tuir fali tan operasaun Kacific ba fornesementu internet via satelit sei utiliza rekursu telekomunikasaun ne’ebé espektu entaun prosesu tuir fali mai sei hakat ba iha lisensamentu espektru no prosesu ne’e Kacific hatama ona pedidu ba ANC no ANC prosesa dadauk ona.
“Ita espera hanesan Kacific fornese internet via satelit espera katak kuandu prosesu lisensamentu espektru ne’e loos ona nia bele hahú ona fornese servisu internet ba área rurais sira ne’e mak preferensia husi Kacific atu fornese internet ba área rurais tanba hanoin iha Díli ita iha kobertura ne’ebé mak di’ak ba area rural Kacific iha interese ne’ebé mak bo’ot tebes atu fornese internet via satelit”, dehan nia.
João Olívio Freitas esplika ANC simu konvite ida husi Prezidente Repúblika atu bele mai konversa uituan ho Prezidente iha pontu ida iha ne’ebá mak ko’alia no mós ANC rona hanoin pozisaun PR nian kona-ba pontu refere iha ne’ebé trata kona-ba investimentu privadu iha Timor-Leste liuliu iha setor telekomunikasaun ligadu ho operadores sira ne’ebé mak rezista ona no hetan sertifikadu rejistrasaun husi ANC.
Nia dehan Partikularmente konversa ho Xefe Estadu ko’alia uituan kona-ba Kacific ne’ebé mak reprezenta mós ninia Diretur ezekutivu oinsá bele aselera prosesu ida liuliu iha lisensamentu espektru ba iha Kacific hodi nune’e sira bele hahu sira nia operasaun iha tempu badak.
Emprinsipiu operadores telekomunikasaun mak rejista iha Autoridade Nasionál Komunikasaun mak operadores servicu mobile tolu (3) depois operadores foun ne’ebé mak rezista tan iha ACN mak Ceslink, no ISP iha ne’ebá hamutuk sia (9). *Jos
