SEJD Husu Sosiedade Transforma Mentalidade Joven TL 
Naunil Media (Díli), Sekretariu Estadu Juventude no Desportu (SEJD) Abrão Saldanha husu ba sosiedade tomak atu ajuda dezenvolve para transforma mentalidade joven Timor-Leste, tanba joven ba mak involve artemasiais.
Kestaun ne’e hato’o husi membru VIII Guvernu Konstitusionál ne’e ba Jornalista sira hafoin remata enkontru ho Prezidente Repúblika PR José Ramos Horta iha palásiu Prezidensiál Nicolau Lobato Bairru Pite, Segunda, (07/11).
“Purke ita hotu hatene iha ema barak tebes mak involve iha artemasiais ne’e lá’os problema simples ida atu rezolve ho minutu ida rua nian lori tempu atu transforma ema nia mentalidade, lori tempu para atu ema manán konsensia, mak ha’u hanoin ita husu sosiedade tomak ita hotu hamutuk oinsá mak ajuda para dezenvolve transforma mentalidade joven sira nian,” dehan SEJD
Membru Governu ne’e hatutan Violensia joven sira iha fatin-fatin ne’e akontese balun baze ba artemasiais no balun la’ós baze ba artemasiais, investigasaun kontinua la’o, seguransa sei tau matan prosesu kontinua lao oinsá mak halo disiplina organiza di’ak liu tan artemasiais.
Abrão Saldanha hateten sede ba artemasiais ne’e agora dadauk iha prosesu ba levantamentu ba sira nia dadus, sira sé mak iha rai, sira sé mak laiha rai la’ós atu fó osan estadu nian para ba harii ema ida nia uma privadu ba organizasaun entaun haree Organizasaun sira ne’ebé iha ona propriedade ka lae.
Nia dehan orsamentu hamutuk 2.5 miloens la’ós de’it harii sede, apoiu sekretariadu para atu dezenvolve sira nia Organizasaun, prepara formasaun ba treinadores sira, hamutuk ho revizaun kurikulum ne’ebé sira iha atu treina ema, resenseamentu ba sira nia membru no kria kompetisaun ho kampionatu ba modalidade ne’e rasik, ne’e mak programa ne’ebé atu halo no ezekusaun ida ne’e guvernu preve ba Dezembru nia laran atu hahú ho karakter multi anual. *Jos
