António Pinto: Governu Presiza Investe Estabelese Estaleiru Naval
Naunil Media (Díli), Dosente husi fakuldade enjenaria Universidade Nasionál Timor Lorosa’e (UNTL), António Ximenes Pinto hateten guvernu presiza investe hodi estabelese Estaleiru Naval tanba Timor-Leste sempre halo manutensaun ba Ró iha li’ur hodi gasta osan boot.
António hato’o lia hirak ne’e ba Jornalista sira hafoin enkontru ho Prezidente Repúblika (PR), José Ramos Horta iha palásiu Prezidensiál Nicolau Lobato Bairru Pite, kuarta (09/11).
“Ami ko’alia ho Nai Prezidente Repúblika liu-liu kona-bá estabelese estaleiru Naval, tanba ita iha Ró barak husi F-FDTL, PNTL no husi públiku i sivil nian maibé, ita sempre halo manutensaun iha rai li’ur ne’ebé gasta osan boot liu maske, ita Timor iha ona rekursu sufisienti ne’e duni ita presiza de’it ekipamentu governu investe, ita bele halo ona servisu sira ne’e”, dehan António Pinto.
Dosente husi fakuldade enjenaria ne’e hatutan ohin sira mós reprezenta fakuldade injenaria UNTL nian ko’alia ho Prezidente Repúblika nune’e mós sira aprezenta sira nia aan nu’udar ema ne’ebé maka hasai ona kursu iha fatin-fatin ho area oi-oin hodi ko’alia kona-ba teknolojia oi-oin ne’ebé Timor-Leste presiza investe iha Timor laran tomak.
António Pinto hateten Prezidente Repúblika mós orienta sira iha fulan Marsu 2023 sira prepara atu lansa semináriu ida ko’alia kona-bá teknolojia.
Tanba ne’e sira sei hanoin atu halo planu kona-bá kestaun ne’e. Tanba ne’e iha fulan Marsu sira sei lansa semináriu ida hodi hatudu ba públiku no parseiru sira, iha ne’ebé Prezidente Repúblika mak sei fó hatene ba sira hodi bele konvida nune’e bele fasilita Timor-Leste atu tama ASEAN. *Jos
