Loron 21-24 TL Sei Realiza Eventu Kultura Iha Ataúru

Naunil Media (Díli), Hahú husi loron 21 too 24 Novembru tinan ne’e Timor-Leste (TL), sei realiza eventu kulturál no múzika iha Ataúru tanba kultura nu’udar identidade uniku ne’ebé bele atrai turista sira husi rai li’ur.

Kestaun ne’e hato’o husi koordenador festival múzika no kultura Ataúru Azevedo Marçal ba Jornalista sira hafoin remata enkontru ho Prezidente Repúblika PR José Ramos Horta iha palásiu Prezidensiál Nicolau Lobato Bairru Pite, Segunda, (14/11).

“Ohin ekipa komisaun Organizadora ba eventu kulturál no múzika Ataúru nian ita mai aktuliza ba Prezidente Repúblika kona-ba progresu servicu no mós preparativus sira, no mós hetan orientasaun no aprovasaun husi Prezidente Repúblika kona-ba preparativus ne’ebé mak la’o ona ne’ebé ita realiza iha dia 21 too 24 Novembru”, dehan Koordenador festival múzika Ataúru

Azevedo hatutan sira mós hakarak partilla ba sidadaun no timoroan tomak ne’ebé mak karik iha interese hakarak partisipa tanba ho objetivu prinsipál husi festival ne’e mak atu esplora indentidade kultura no turizmu timoroan nian.

Koordenador ne’e esplika iha festival múzika ne’e mós sei Promove no proteze kultura nu’udar identidade uniku Timor-Leste ne’ebé mak bele atrai turista sira husi rai laran no mós husi rai li’ur, no hasa’e kreatividade joven timoroan iha area arte no kultura, nune’e mós sosializasaun identidade kultura ba jerasaun foun sira, no promove paz, estabilidade no unidade nasionál.

Nia dehan durante festival ne’e mós iha aktividade no inisiativa sira parte grupu tolu ne’ebé mak primeiru halo aktividade hamutuk Walu, komkursu hamutuk haat, modalidade haat, aktividade ne’ebé kobre maka múzika instrumental tradisionál no desfile tais tradisionál Munisípiu 14 hotu.

“Aleinde aktividade ita mós iha konkursu kompetisaun sira ne’e iha tasi no mós iha rai maran iha Ataúru Adventure no mós iha Korrida Ró ita iha nani taru halai sae foho no mós kurrida Bisikleta ida ne’e mak aktividade prinsipais ne’ebé mak sei halo,” katak Nia

Kona-ba finansiamentu Prezidensiá Repúblika rasik mak sei apoiu no hetan mós apoiu husi Guvernu iha liñas Ministeriais ne’ebé mós nia portufoliu ba turizmu no kultura nian entaun hetan apoiu mós husi Sekretariu Estadu Arte no Kultura no MTCI, gabinete Primeiru Ministru no mós parseiru dezenvolvimentu sira seluk.

Nia dehan partisipante sira dadaun ne’e iha konfirmasaun 2.652 mak konfirmadu ba maibé dalaruma too iha rua 21 ne’e dalaruma sei barak tan no husi Munisípiu sira hamutuk 386 no sira ne’ebé mak rejista ona atu tuir kompetisaun hamutuk 1070 mak rejista no prontu ona tuir kompetisaun.

Totál orsamentu ho montante purvolta 500.000 ne’e depende tanba aktividade seidauk la’o hotu maibé lagasta too millaun hanesan ne’e laiha no mós programa ne’e integra kedas ona ministeriu ida-idak nian.*Jos