Governu Prevé Orsamentu $ 500.000 Ba Selebrasaun 28 Novembru
Naunil Media (Díli), Selebrasaun Loron Proklamasaun Independensia Repúblika Demokrátika Timor-Leste 28 Novembru ba dala-47 tinan ne’e guvernu Prevé orsamentu hamutuk $ 500.000 ba serimonia refere.
“Tema ba selebrasaun 28 Novembru tinan 2022 nian mak ho selebrasaun ne’e “Mai Ita Hamutuk Kontinua Luta ba Povu Nia Moris Di’ak”. Komisaun Organizadora prevé orsamentu ba selebrasaun 28 Novembru ne’e hanesan baibain 500.000 dolares Amérikanu,” dehan Ministru Administrasaun Estatal (MAE), Miguel Pereira de Carvalho ba jornalista sira hafoin remata enkontru ho Prezidente Repúblika (PR), José Ramos Horta iha palásiu Prezidensiál Nicolau Lobato Bairru Pite, Kinta (17/11).
Membru guvernu ne’e hatutan nu’udar prezidente komisaun Organizadora ohin aktuliza ba Prezidente Repúblika kona-ba ba preparativus sira ba 28 Novembru nune’e mós Konvida Xefe Estadu atu atende evente ne’e hahu husi loron 22 too 28 Novembru.
“Ohin ha’u hanesan Prezidente komisaun Organizadora ba selebrasaun dia da Proklamasaun Repúblika Demokrátika Timor-Leste nian ba dala 47, mai aktuliza ba Prezidente Repúblika kona-ba preparativus sira ba 28 Novembru tinan ida ne’e nian no Konvida Prezidente Repúblika para atu atende iha eventu mak sei dekora apartir 22 Novembru ate dia 28 Novembru,” katak membru guvernu
Ministru ne’e hateten prinsipalmente aktividade sira hanesan feira ne’ebé mak komisaun Organizadora trasa ona para ke atu inisia iha 22 Novembru ate 28 Novembru, feira ida ne’e sei reuni ka sei tau hamutuk aktividade komersiál, kooperativa, espozisaun husi ministeriu hotu-hotu komisaun Organizadora liu husi MTCI para atu bele partisipa.
Miguel Pereira mós informa ba Prezidente Repúblika katak ho komemora 28 Novembru tinan ida ne’e sei realiza misa agradesementu iha Igreja Manatuto iha 26 lorokraik, wainhira misa remata, konvidadus sira sei ba tau aifunan iha jardim dos Herois Manatuto nian hodi nune’e bele fo homenajen ba Herois no martires sira ne’ebé mak ho sira nia mate hodi Timor-Leste sai nasaun independente ida.
Nia dehan serimonia 28 Novembru ne’e sei kulmina iha 28 Novembru iha vila Manatuto ho icar de Bandeira nasionál ne’ebé mak sei hahú tuku 8 dadersan, serimonia ne’e sei prezide husi Prezidente Repúblika hanesan baibain Xefe Estadu sei prefere nia diskursu ba nasaun tomak iha 28 Novembru ne’e.
Iha serimonia ne’e mós sei fo kondekorasaun ba veteranu sira hamutuk 74 husi rai laran no mós nain-5 husi rai li’ur no mós sira ne’ebé mak Prezidente Repúblika hili atu kondekora iha 28 Novembru tinan ne’e. No iha 28 Novembru kalan sei realiza konsertu múzika ne’ebé sei anima populasaun sira hotu iha Manatuto no mós sei iha transmisaun direita ba populasaun Timor laran tomak.*Jos
