PR Horta: Eleisaun Tinan Oin PARPOL Sira Labele Insulta Malu
Naunil Media (Liquiçá), Prezidente Repúblika (PR) José Ramos Horta hateten eleisaun lejislativa ne’ebé realiza iha tinan oin partidu polítiku (PARPOL) sira labele insulta no tolok malu hanesan kampaña Prezidensiál liu ne’e.
“Tanba ha’u nia responsabilidade mak buka viabiliza guvernu nia servisu Prezidente labele sai opozisaun ba guvernu ou halo konfrontasaun ho Parlamentu Nasionál, i ha’u prekupadu mak haree prepara aan para eleisaun mai ne’e mós la’o iha ambiente ne’ebé di’ak Pasífiku i labele hanesan kampaña Prezidensiál tolok, insulta depois kandidatu balun ho elementu ne’ebé halo ameasa,” dehan Horta ba Jornalista sira hafoin vizita Institutu BAMBÚ, Tibar, kuarta (16/11).
Xefe Estadu ne’e mós hakarak haree kampaña ba eleisaun lejislativa ne’e sibilizadu laiha insulta malu entre partidu polítiku sira no mós membru kandidatu sira nune’e partidu ida-idak bele aprezenta de’it programa ba povu la’ós promesa de’it.
“Purtantu ha’u hakarak haree kampaña mai 2023 ne’e 100% sibilizadu laiha atake insultu pesoal entre partidu sira, membru kandidatu partidu sira tenke la’o la’o ho loloos. Partidu sira aprezenta ba povu ida-idak nia programa ha’u haree ke partidu ida la aprezenta programa ha’u husu nu’udar Prezidente ha’u interven imi nia programa iha ne’ebé ha’u hakarak haree la’ós ba halo de’it promesa”, katak Xefe Estadu
Ramos Horta hateten Partidu ne’ebé ko’alia mangame la aprezenta programa Nia (Prezidente Repúblika) bolu CNE no hateten partidu saida mak ne’e purtantu nu’udar Xefe Estadu aviza kedas ba partidu sira tanba Prezidente hakarak partidu polítiku sira aprezenta programa ba povu.
Nia dehan dadaun nu’udar Prezidente Repúblika maibé iha relasaun di’ak ho líder sira hotu-hotu hahú ho maun boot Xanana Gusmão, Dr. Marí, Primeiru Ministru Taur Matan Ruak, eis Prezidente Repúblika Francisco Guterres Lú Olo, General Lere Anan Timur sira hotu-hotu, no sira hotu ne’e laiha problema tanba haree ambiente dezde Maiu mai oin ne’e ambiente di’ak ho Parlamentu Nasionál, Guvernu, Prezidensiá.*Jos
