PR Horta: Governu La Fó Antensaun Ba Plantasaun BAMBÚ

Naunil Media (Liquiçá), Prezidente Repúblika (PR), José Ramos Horta hateten durante tinan hira nia laran guvernu ladun fo atensaun ba plantasaun BAMBÚ mezmu parseiru Internationál balun fó apoiu maibé laiha planu estratéjiku atu dezenvolve plantasaun BAMBÚ.

“Ha’u hare’e ke iha tinan sira nia laran ne’e guvernu ladun fó atensaun ba BAMBÚ ne’e, plantasaun BAMBÚ ladún bo’ot ladún di’ak halo buat balun tinan lubuk ida nia laran ne’e, sim iha kooperasaun Internationál balun husi Xina, UNDP, sira fó apoiu mas laiha planu estratéjiku para  dezenvolvimentu plantasaun BAMBÚ, kuda BAMBÚ iha Timor laran tomak i depois halo industria”, dehan Horta ba jornalista sira hafoin vizita Institutu BAMBÚ, Tibar, Kuarta (16/11).

Xefe Estadu ne’e mós la komprende tau fali institutu BAMBÚ iha Ministeriu Agrikultura nia okos ne’e BAMBÚ, ai nia plantasaun bele iha Ministeriu Agrikultura, mas ne’e hanesan industria ona loloos iha Ministeriu Komérsiu Industria nia okos ou halo Institutu autonomu.

PR hateten se halo investimentu di’ak liu tan ho parseria teknika Internationál Timor bele hetan naran iha mundu relasionadu ho BAMBÚ la’ós bo’ot hanesan rai sira seluk tanba presiza espasu fatin ne’ebé bo’ot teb-tebes Timor laiha mas bele hetan naran ho kualidade no dezeñu. Maibé too agora Nia haree Timor oan sira ne’ebé servicu iha ne’ebá ne’e badinas, servicu ho fuan ho sira nia matenek maibé laiha kondisaun sufisiente.

Horta mós agradese parseiru Internationál sira iha tinan sira nia laran balun fó apoiu uituan mas laiha planu ida estratéjiku kompriensif para dezenvolve industria ne’e di’ak, la’ós para halo de’it meza, kadeira, banku, armari buat sira ne’e para halo mós uma ho kualidade ba turizmu ou ba ema nia Rezidensia.

Tanba ne’e Prezidente Repúblika sei haree purtantu se sira aprezenta ba Xefe Estadu relatoriu ida, proposta ida, proposta ne’ebé moris bazeadu mai husi relatoriu ne’e saida mak halo tiha ona, saida mak dezafiu boot planu ba tinan-5 tinan-10 mai ne’e saida no PR bele hamutuk ho sira halo kontaktu Internationál mobiliza apoiu ne’ebé kompletu. No Prezidente lakohi husu makina ida ka rua haree buat hotu-hotu ne’ebé presiza para industria ne’e ba oin duni.

Iha fatin hanesan Diretur Institutu BAMBÚ Tibar Anito Matos hateten mezmu ho limitasaun ne’ebé sira iha maibé sira sempre servicu ho responsabilidade ho hatama osan ba kofre estadu tanba ne’e husu ba guvernu atu labele koa sira nia osan nune’e sira bele halao sira nia programa ne’ebé iha

“Mezmu ami ho limitasaun ne’ebé mak iha mas ami sempre servisu ho korajen no responsabilidade para hatama osan ba kofre do estadu, ohin iha vizita ne’e mós Prezidente Repúblika husu ami para hato’o relatoriu ba Nai Prezidente para ho Nai Prezidente nia influénsia ho konektividade Internationál no mós bele ko’alia ho guvernu para iha orsamentu ratifikativu bele hanoin oinsá mak tinan oin institusaun BAMBÚ ne’e labele koa ami nia osan hanesan tinan rua tuir-tuir malu entaun ami nia programa barak ami tenke kansela,” katak Diretur BAMBÚ.*Jos