Semana Oin Balanku Original Karta Kondusaun Sei to’o Iha TL

Naunil Media (Díli), Xefe departamentu  ba Karta kondusaun ka Surat izin mengemudi (SIM) iha Diresaun Nasional Transporte Terestre  (DNTT) João Maria Belo Ximenes hateten, Semana oin balanku original sei to’o iha Timor-Leste, hodi emite ba kliente sira ne’ebé dau-daun ne’e uza karta kondisaun provizoriu.

“Balanku original seidauk iha, maibé kompaña ne’ebé mak manan tender ba balanku original semana oin balanku original to’o ona iha Timor-Leste”, dehan João Maria Belo Ximenes ba jornalista sira iha nia knaar fatin DNTT Akanunu Hera, kinta (17/11).

Nia hatutan, Tinan 2020 to’o ohin loron siadadun sira ne’ebé uza transporte motor no kareta hotu- hotu utiliza karta kondusaun provizoriu, tanba balanku original la iha.

Tanba ne’e perkupasaun ba kliente sira ne’ebé uza transporte motor no kareta tanba karta kondisaun ne’ebe mak DNTT fó de’it durasaun fulan tolu, nia haktuir.

“Iha kompaña Marmori Lda ne’ebé mak manan na’in ba tender karta kondisaun ne’e fó ona lampu matak hodi lori balanku original mai Timor-Leste iha semana oin”, katak nia.

Nia afirma, Kliente ne’ebé mak dadaun ne’e hetan ona karta kondisaun provizoriu sei la selu tan karik balanku original ne’e to’o tanba ne’e kliente sira nia diretu.

Entaun kliente ne’ebé mak dadaun ne’euza karta kondisaun provizoriu ne’e hamutuk 21.202.

Hosi 21.202 ne’e siadadun estratejeru hamutuk 615 no siadadun Timoroan  hamutuk 20.587  no total feto hamutuk 4.241 no mane hamutuk 16.961, hakotu nia. *Ana