Dan Gomes Kontenti Governu Realiza Eventu Festival Iha Ataúro

Naunil Media (Ataúro), Komunidade Dan Gomes sente Kontenti tanba VIII Guvernu Konstitusionál hamutuk ho Prezidensiá Repúblika bele realiza eventu festival múzika no kultura iha mundu Ataúro hodi Promove kultura Timor-Leste.

“Ha’u Atauro oan sente kontente bainhira eventu ida ne’e iha Munisípiu Atauro, tanba ida ne’e ita bele promove mós produtu lokál komunidade iha Munisípiu Atauro liu-liu hanesan produtu kreatividade, homan, ukir ida ne’e mós bele promove daudauk ami nia produtu hasa’e ba merkadu, tuir programa Prezidensiá Repúblika nian, ida ne’e agradese barak ba Prezidensiá Repúblika nia programa, nune’e liu husi programa ne’e bele fó benéfísiu ba Atauro oan tomak”,  dehan Dan Gomes ba jornalista sira iha Ataúro, Segunda, (21/22).

Nia hatutan ho eventu sira hanesan ne’e bele fo benefisia nune’e mós bele Promove produtu lokál sira ne’ebé iha Atauro. No mós iha Ataúro komunidade barak ne’ebé maiória produs produtu hanesan homan bote, lafatik, Suku Makili sira produs ka ukir hanesan estatua ne’ebé nu’udar istória kultural iha tempu uluk.

Komunidade ne’e esplika iha aldeia Arlo mós produs kona-ba sanan rai ne’ebé istóriku, uluk avo sira tau produtu sanan rai ne’e hodi tein entaun agora komunidade sira promove nafatin nune’e bele promove ba merkadu ne’ebé ema atu sosa.

Iha fatin hanesan komunidade Mariano Pereira, Suku Villa, Aldeia 3 hatete Ataúro foin harii sai Munisípiu, maibé estadu, governu bele realiza eventu festival kulturál iha Munisípiu Ataúro.

“Ami sente kontente tanba Munisípiu Atauro ne’e foin harii maibé estadu ho governu bele realiza festival kulturál ida hanesan ne’e iha Munisípiu Atauro”, katak Mariano. *Jos