Azevedo: Objetivu Festival Mak Hakarak Esplora Indentidade Kultura

Naunil Media (Ataúro), Prezidente Komisaun Organizadora ba Eventu Múzika no Kultura Ataúro Azevedo Marçal hateten objetivu husi festival múzika no kultura ne’e mak hakarak esplora no Promove indentidade kultura.

“Objetivu husi ita nia festival  ida nee maka, ita hakarak esplora, promove identidade kultura no turismu iha Atauro. Hakarak hasae kreatividade joven sira iha arte no kultura no halo sosializasaun ba arte no kultura ba jerasaun foun sira”, dehan Azevedo liu husi diskursu bainhira atu hahú abertura ba Eventu Múzika no Kultura iha Ataúro, Segunda, (21/11).

Prezidente Komisaun Organizadora ne’e hatutan ho serimonia sira hanesan ne’e mak timoroan sira bele hatene identidade no Promove tanba identidade ne’e sei reforsa Promove unidade nasionál.

“Tanba sa mak ita tenki hatene ita nia identidade no promove, tanba identidade ne’e mak sei reforsa no promove ita nia unidade nasionál hodi promove paz no estabilidade”,katak Prezidente KO.

Azevedo esplika festival ida ne’e kobre asuntu tolu (3), nune’e nia bele kobre aktividade durante loron haat (4) nia laran, akompaña ho aktividade hamutuk sia (9) no kompetisaun hamutuk haat (4) no konkursu mós hamutuk haat (4).

Nia hateten Festival ne’e inisiativa husi Prezidente Repúblika (PR) José Ramos Horta no Primeiru Ministru (PM), Taur Matan Ruak ne’ebé hetan apoiu husi parseiru dezenvolvimentu sira liu-liu povu Ataúro.

Nia dehan, partisipante ne’ebé partisipa iha Feztival Kuktura Ataúro hamutuk 2500 to’o 3000,husi total ne’e 1200 mak sei hola parte iha kompetisaun ne’ebé komisaun organizador organiza no preparasaun ba eventu ne’e rasik durante lori semana rua (2).  *Jos