FEATUREDIkus LiuNewsSeguransa

Polísia Tranzitu Bobonaro Prende Viaturas 10 Kontra Kodigu Estrada

Fahe Tutan

Naunil Media (Maliana), kuarta (7/12/22)  Komandu Polísia Nasionál Timor-Leste (PNTL) Munisípiu Bobonaro, liu hosi seksaun tranzitu, halo atividade Auto Stop (check point) hodi kontrola movimentu transporte públiku sira ne’ebé sirkula iha área hirak hanesan Cailaco, Maumali no Ritabou hodi regulariza seguransa rodaviaria.

Komandante PNTL Munisípiu Bobonaro, Superintendente Antonino Mauluta informa, Atividade ne’e hodi kontrola viaturas no mós haree ba sasan kontra bandu seluk.

“Haree ba asidente trafiku ne’ebé komesa as, ita orienta Xefí Seksaun Tranzitu hamutuk ho nia membru sira, hala’o operasaun rutina liu hosi pasa revista hodi regulariza seguransa rodaviaria no kontrola sasan kontra bandu sira seluk”, esplika Mauluta, via telefone foin lalais ne’e.

Nia dehan, Viaturas hirak ne’ebé membru tranzitu sira halo aprensaun, tanba maioria laiha karta kondusaun, dokumentu invalidu, la uza kapasete no tula malu iha motor liu na’in tolu.

“Ita konsege prende viaturas 10 kompostu hosi motorizada 7, kareta 3 no dokumentus viaturas ni’an 5, tanba viola kodigu estrada, daudaun ne’e ekipa evakua ona evidensia sira ne’e mai iha fatin Tranzitu iha Komandu PNTL Munisípiu Bobonaro, hodi kontinua prosesu tuir lei kodigu estrada nian”, subliña. 

Alende ne’e  nia informa mós ,  PNTL Esquadra Atabae, junta ho  Oficial Polísia Suku (OPS)Suku Hataz no membru Unidade Polísia Maritima ( UPM) Postu Atabae, halo atividade check point iha Esquadra Atabae hodi regulariza dalan no haree mós ba sidadaun sira ne’ebé lori fugetis tuir dalan  illegal.

Enkuantu atividade pasa revista ne’e  halo husi Seksaun polísia  Tranzitu hetan apoiu hosi seksaun operasaun, Forsa rezerva, membru Unidade Polísia Maritima ( UPM), Oficial Polísia Suku (OPS), Esquadra sira no Servisu Informasaun Polísia (SIP) Munisípiu Bobonaro. Gyor

Leave a Reply

Your email address will not be published. Required fields are marked *