Sekoms-Plan Internasionál Servisu Hamutuk Kombate Hoax, Iha Munisípiu Ainaro
Naunil Média (Ainaro), Sekretáriu estadu ba komunikasaun sosial (SEKOMS sigla portugés), servisu hamutuk ho Plan Internasionál realiza kampaña nasionál hodi kombate Hoax no promove internet saúdavel, liu husi sensibilizasaun literasia digital ba komunidade, familia, no estudante sira iha suku foho-Ailico, Postu Administrativu Hato Udo, Munisípiu Ainaro.
Sekretáriu estadu komunikasaun sosial Mericio juvinal dos Reis “Akara” haktuir, Direitu ba asesu internet no direitu ba online ne’e direitu foun ida ne’ebé mak ita hotu-hotu agora hetan, uluk seidauk iha direitu ba internet, tanba uluk internet laiha, direitu ba internet ho online laiha.
Depois era ida ne’e, internet no online iha ona entaun direitu foun ida mosu mak direitu asesu ba internet no online, entaun nasaun hotu tenki asegura fali direitu foun ida ne’e.
“Governu iha responsabilidade atu prepara nia sidadaun para atu iha matenek, kapasidade, konesementu no iha skil atu uza direitu ba internet, telefone no direitu ba online, ne’ebé ida ne’e mak ita ejiji no ita hakarak”, dehan Akara ba jornalista sira iha Munisípiu Ainaro, Sexta (9/12).
Governante ne’e hatutan, Bele uza direitu ba internet, maibé uza ho matenek, ho kapasidade, no uza ho konesementu para labele utiliza sala.
Enkuantu literasia digital nia objetivu mak atu eduka no halo diskusaun, i atu hasa’e konesementu para sidadaun hotu sa’e to’o virgula 3000 habitante iha direitu ba ida ne’e.Entaun governu liu husi SEKOMS kolabora ho parseiru sira hanesan Plan internasionál, ita prepara sidadaun para sira iha kapasidade matenek hodi utiliza, dehan nia.
Iha fatin hanesan Adjunta Diretora Plan internasionál iha Timor-Leste Fatima estrela Soares katak, Plan internasionál kolabora ho SEKOMS atu hare oinsá mak bele sensibiliza literasia digital ida ne’e ba iha Munisípiu sira atu iha prevensaun, liu-liu oinsá hasa’e konsiensia inan aman sira atu bele tau matan ba oan sira, oinsá atu bele utiliza plataforma online sira ho seguru.
Nune’e edukasaun ida ne’e mós ba foinsae sira atu bele sira hatene ida ne’ebé mak sai vantajen no desvantajen ba sira nia an no ba sira nia futuru.
Enkuantu SEKOMS servisu hamutuk ho Plan internasionál hodi halo sensibilizasaun Literasia digital hodi la’o ba Munisípiu sira ne’ebé mak tarjetu, totál orsamentu ba programa sensibiliza ne’e hamutuk 15 mil, ne’ebé apoiu husi governu Austrália. LTS
