Governu Japaun Enkontru Ho Governu TL Haruka Joven Timoroan Ba Servisu Iha Japaun

Naunil Média (Díli), iha loron Tersa dia 10 fulan Janeiru tinan 2023 Sekretária Estadu Formasaun Profisionál no Empregu (SEFOPE),  Alarico de Rosario akompaña husi Diretór Jerál, Diretór Nasionál sira iha salaun SEFOPE Kaikoli, hala’o enkontru hó Embaixadór Japaun mai Timor-Leste Kimura Tetsuya hó ekipa delegasaun husi Japaun hodi ko’alia kona-bá oinsá atu haruka joven Timor-oan ba servisu.

“Iha enkontru ne’e Sekretária Estadu Formasaun Profisionál no Empregu Alarico de Rosario agradese ba Embaixadór Japaun mai Timor-Leste hó ekipa delegasaun husi Japaun ne’ebé iha komitmentu mai to’o iha Timor-Leste hodi ko’alia oinsá atu haruka joven timor-oan ba hala’o estajiu hodi hetán mós servisu, atu bele hadi’a ekonomía família no nasaun”. Dehan sekretáriu SEFOPE ba jornalista iha salaun SEFOPE, Tersa (10/1).

Nia afirma iha sorumutu ne’e Governu Japaun hó mós empregadór komprimitidu atu simu joven timoroan sira ba hala’o estajiu no bele hetán servisu iha Japaun, maibé Memorandum Intendimentu ida ne’ebé governu Japaun hó Timor-Leste maka sedauk realiza, maibé iha ona diskusaun tempu badak bele asina ona Memorandu Intendimentu ne’e.

Governate ne’e mós hateten iha tempu badak governu Japaun sei simu uluk traballadór timor-oan na’in lima sai hanesan pilotu hodi ba hala’o estajiu no hetan servisu, karik hatudu komportamentu servisu di’ak, ba futuru governu Japaun sei bele emprega barak liután joven timor-oan sira ba hetán empregu.

Entretantu Embaixadór Japaun mai Timor-Leste Kimura Tetsuya mós hateten katak, área servisu ne’ebé governu Japaun sei oferese ba joven timoroan sira ba hetán servisu maka área agrikultura, hodi nune’e sira bele hetán osan, esperensia no mós bele adapta’an ba teknologia iha Japaun. LTS