KM Aprova mós Projetu Dekretu Lei Kriasaun Apoiu Pontual ba Vulnerável Sira
Naunil Media (Díli), Ministru prezidensia konsellu Ministru (KM) Fidelis Manuel Leite Magalhães, informa liu husi reuniaun Konsellu Ministru aprova ona projetu dekretu lei ne’ebé aprezenta husi vise ministra solidariedade sosiál no inkluzaun (V-MSSI), Signi Chandrawati Verdial, kona-ba kriasaun apoiu pontual ba vulneravel sira
Diploma ida-ne’e ho objetivu atu halo kriasaun apoiu sira ne’ebé atribui husi Estadu ba indivídu no família sira iha situasaun estrema vulnerabilidade sosiál, hodi garante satisfasaun ba nesesidade bázika durante prosesu reinsersaun sosiál nian.
“Apoiu ida-ne’e sei atribui, pontualmente ba indivíduu no família sira ne’ebé hasoru situasaun estrema vulnerabilidade temporáriu, ho forma hanesan bein alimentár, beins naun alimentár sira husi nesesidade báziku ba uza pesoál, beins husi nesesidade báziku ba uzu doméstiku, apoiu pekuniáriu no apoiu psikososiál”. Dehan Ministru prezidensia konsellu Ministru ba jornalista iha palásiu Governu, Kuarta (25/1)
governante ne’e hateten, Tipu apoiu públiku ne’ebé atribui no ninia montante depende ba avaliasaun husi situasaun vulnerabilidade sosiál husi profisionál departamentu governamentál responsavel husi asisténsia sosiál nian.
Nune’e Montante ba apoiu pekuniáriu ne’e labele liu husi dolar amerikanu 500, exetu iha situasaun sira transladasaun ba mate-isin sira ho montante másimu ne’ebé fiksa ona ho dolar amerikanu 5.000. LTS
