MTKI Aprezenta Lei Baze Turistika Ba KM
Naunil Media (Díli), Ministru Turizmu, Komérsiu no Indústria (MTKI), José Lucas do Carmo da Silva, halo aprezentasaun rua kona-bá opsaun sira polítika-lejizlativa ne’ebé sai hanesan baze ba inisiativa hodi kria Lei Baze ida ba Atividade Turístika no Subjasente ba inisiativa kriasaun Autoridade Turizmu ida ba Timor-Leste.
“Objetivu husi inisiativa ba kriasaun Lei Baze ida ba Atividade Turístiku mak atu estabelese sistema turizmu, iha oferta no prokura, ho definisaun baze organizasaun, monitorizasaun, fiskalizasaun, promosaun no fomentasaun ba atividade turístika sira”. Dehan ministru prezidensia konsellu ministrus Fidelis Manuel Leite Magalhães iha palásiu governu, segunda (1/3)
Governante ne’e hateten, Lei Baze ida-ne’e sei aplika ba atividade turístiku husi setór públiku no privadu, turista rai-laran no internasionál sira, ba rezidente, prestadór serbisu no fornesedór produtu no serbisu turístiku sira, nune’e mós ajente turizmu sira seluk.
Enkuantu Autoridade Turizmu Timor-Leste, ne’ebé kontrola husi membru Governu ne’ebé iha tutela ba turizmu, sei sai responsavel ba implementasaun husi polítika no planu estratéjiku turizmu nian, ho objetivu atu promove, kapasita, koordena, akompaña no dezenvolve setór privadu no públiku, hodi kontribui ba promosaun no fortalesimentu turizmu no ba dezenvolvimentu ekonómiku país nian. LTS
