Akara : “Estudante Uza Plataforma Dijital Tenke ho Matenek Hasa’e Kuiñesementu”
Naunil Media (Díli), Sekretáriu Estadu Komunikasaun Sosial (SECOMS-Sigla Português), Merício Juvinal dos Reis “Akara”, hateten estudante sira uza plataforma dijital tenke ho matenek hodi hasa’e kuiñesementu no krítiku ba an rasik no ba sosiedade.
Merício Akara, apela asuntu ne’e liu husi Siensibilizasaun Literasia Dijital ba estudante sira Eskola Sekundária Lere Anan Timur Lospalos, ho objetivu atu minimiza lia falsu (Hoax), promove internet saudável, Sábadu (18/03).
“Sidadaun sira hodi utiliza Internet ba buat ne’ebé pozitivu no benefisiu ba futuru, Governu sei la hapara transformasaun dijitál sira hanesan ne’e, maibe Governu nia hanoin hakarak prepara nia sidadaun sira, tanba iha era sira hanesan ne’e sidadaun sira tenki utiliza plalataforma digital ho matenek”, haklaken governante ne’e.
Merício hateten, VIII Governu lideradu husi, Jenderal Taur Matan Ruak, liu husi SECOMS, nafatin tau prioridade ba Kampaña Nasionál Kombate HOAX no Promove Internet Saúdavel, Liu husi Sensibilizasaun Literasia Dijitál.
“Programa kampaña nasionál ne’e atu prepara sidadaun hotu, liu-liu estudantes sira hodi prepara aan ho matenek wainhira utiliza plataforma dijital ho saudavel no seguru, tanba internet iha informasaun positivu no negative, tanba ne’e VIII Governu nia papel maka oinsa utiliza internet ba humanidade ( intenet for humanity) ho saudavel”, tenik Akara.
Tuir Nia, wainhira sidadaun sira utiliza plataforma ho matenek maka bele promove seitor potensial munisipiu ninian ba mundo hodi dada investidor nomos turista husi rai liur.
“Agora era diplomasia dijital, tanba ne’e sidadaun ne’ebé iha Kanal YouTube, Facebook, Instragram ,Tiktok ne’e bele promove ona potensia saida de’it mak iha munisípiu ne’e iha. Uza ita nia Dijital promove ita nia kreatividade,ita nia potensial Suku no Aldeia nian, Munisípiu nian para ema hotu bele hatene”, dehan nia
Nia esplika, Governu mós desenvolve ona projetu cabo submarinu husi nasaun Australia mai Timor-Leste atu asegura nafatin direitu sidadaunTimor oan nian ba informasaun.
“Hau nia hakarak sidadaun Timor-Leste, hotu hotu iha kapasidade, skill utiliza média sosiál ho pozitivu no matenek, hodi promove rai ida ne’e, e sai mós diplomata, no promove ba nasaun no mundu kona-ba Dezenvolvimentu Timor nian”, realsa Merício
Entertantu Konselleiru Konsellu Imprensa, Amito Araújo, hateten Promove Liberdade Imprensa no Liberdade Espresaun iha ambitu transformasaun dijitál iha Timor-Leste ne’e konsagra ona iha Konstituisaun RDTL Asegura liberdade Imprensa no liberdade Espresaun hakerek iha artigu 40/41 asegura liberdade fo espasu ba ema hotu atu espresa nia liberdade.
Nia hatutan, KI nafatin kopera ho SECOMS hodi fahe informasaun liu husi Kampaña Nasionál Kombate HOAX no Promove Internet Saúdavel, Liu husi Sensibilizasaun Literasia Dijitál neébé durante neé lao ona.
Partisipa iha Siensibilizasaun Literasia Dijital ne’e Representante Administrador Munisipiu Lautem, Profesor/a no Estudante Sekundaria Jeral Lere Anan Timur.
Kampaña nasional kombate hoax no promove internet saudável liu husi siensibilizasaun literasia dijital antes ne’e tama ba Munisípiu 7 iha teritori Timor-Leste no kompre ona Eskola Sekundaria Jeral no Vokasional hamutuk 18, kada Sensibilizasaun partisipante husi Estudante no Profesor/a mais menus hamutuk 250 pesoas kada Eskola. Aba
