Governu Sei Inagura Eskola Foun 59 Iha Teritóriu Nasionál
Naunil Média (Díli), Governu liu husi Ministeriu edukasaun juventude no desportu (MEJD) sei inagura eskola foun hamutuk 59 iha territóriu nasionál iha loron segunda semana oin dia 17 fulan Marsu tinan ne’e, kompostu husi eskola pre-eskolar to’o ensinu sekundariu
Ministru Edukasaun Juventude no Desportu, Armindo Maia hateten, segunda semana oin Ministru MEJD sei konvida Primeiru Ministru Taur matan Ruak atu partisipa iha eventu rua mak hanesan, ida mak inagurasaun segunda faze infrastrutura edukativa ne’ebé tuir planu sei hala’o iha semana oin ba eskola hamutuk 59 ne’ebé kompostu husi projetu komunitariu kapitál dezenvolvimentu i aumesmu tempu mós lansamentu primeira pedra ba eskola hamutuk 86 ne’ebé tama iha Orsamentu tinan 2023 nian.
“Eventu rua ne’e ita sei konsentra hotu iha fatin, no ita sei hala’o iha Maliana, iha segunda semana oin dia 17 fulan Abríl tinan ne’e”. Dehan Ministru MEJD Armindo Maia ba jornalista hafoin hasoru malu ho Primeiru Ministru Taur Matan Ruak iha palásiu governu, Tersa (11/4)
Governante ne’e hateten, eskola hamutuk 59 iha territóriu nasionál ne’ebé mak atu inagura semana oin iha dia 17 fulan Marsu tinan ne’e, eskola ho nia sala de aula hamutuk 200
Enkuantu Orsamentu ba konstrusaun eskola 59 ne’e totál hamutuk serka de 125 miloes, no orsamentu ne’e mai husi tinan 2021 ninian. LTS
