PNTL Kaptura Joven Na’in 4 Iha Fronteira
Naunil Media (Maliana), Polísia Nasionál Timor-Leste, (PNTL) unidade Patroliamentu Fronteira (UPF) kaptura ona joven na’in 4 iha Fronteira
Komandante Unidade Patrullamentu Fronteira (UPF), Superintendente Euclides Belo, Hateten membru PNTL horikalan kaptura tan sidadaun timor-oan na’in 4 iha área fronteira, suku Odomau postu administrativu Maliana, munisípiu Bobonaro, ne’ebé tama hosi Atambua-Indonezia iha loron, kuarta 25/08.
“Atu informa deit horikalan ita halo operasaun koordenada ne’ebé maka halo husi PNTL munisípiu Bobonaro, UPF servisu sekreta sira iha área Bobonaro liu-liu iha Maliana, aguarda tan sidadaun na’in 4, ne’ebé deskunfia sira fila hosi Indonezia”, Dehan komandante UPF Euclides Belo, iha Sentru Formasaun Polísia, Comoro, kuarta ne’e.
Euclides hatutan, Agora daudaun sidadaun timor-oan na’in 4 ne’e iha hela prosesu identifikasaun no sei entrega ba parte saúde Bobonaro nian, hodi evita propagasaun moras Covid-19.
“Alende na’in hat ne’e, horikalan iha postu Alto Lebos mós simu sidadaun ida hosi Maliana ne’ebé entrega an ba ita nia membru PNTL no F-FDTL, daudaun ne’e submete ona ba kuarantena tanba deskunfia nia mós fila hosi Indonezia”, Nia subliña.
Euclides Belo apela, husu nafatin ba komunidade sira iha liña fronteira atu informa ba parte seguransa, karik deskunfia timor-oan balu ne’ebé fila husi nasaun viziñu Indonezia hodi kumpri protokolu saúde nian.
“Ami nafatin informa ba komunidade sira liu-liu sidadaun sira iha liña frontier, a katak timor-oan sira ne’ebé maka hakat ba nasaun viziñu fila mai labele subar. Obrigatoriumente bele informa ba parte seguransa hodi kumpri protokolu saúde nian, tanba moras variante Delta ne’e perigu tebes. Tanba ne’e maka sidadaun ne’ebé komete iregularidade hodi kontra lei tenke kumpri uluk lai protokolu saúde nian, depois maka hatan ba prosesu tuir mai”, Nia afirma. Pau
