SEPS Verifika Lista Reklamantes 20 Mil Atu Apoiu Matérial Konstrusaun

Naunil Media (Dili), Sekretáriu Estadu Protesaun Sivil (SEPS) verifika lista reklamasaun hamutuk 20 mil, atu fó apoiu matérial konstrusaun ba sira ne’ebé makaa afetadu dezastre naturais iha loron 4 fulan Abril tinan ne’e. 

“Ami hamutuk ho autoridade lokal Sira tenki verifika iha terenu, tuir lista ne’ebé maka simu, sira iha direitu atu simu ou lae, se sira nia uma afetadu duni sira iha direitu tomak  atu simu apoiu emergénsia ida ne’e. Lista reklamasaun ne’e tama kuaze rihun 20 resin ne’ebé ita halo verifikasaun no halo koordenasaun didi’ak ho autoridade lokal sira haree situasaun real iha terenu, ita fó apoiu ne’ebé sira sei iha oportunidade to’o iha ne’eba.

Ita hotu hatene ita-nia maluk balun iha tasi tolu no balu iha bairo pitte, i sira-nia lista reklamasaun lubuk ida, maibé ita komesa verifika ona, no balu fó ona apoiu,” dehan diretur Gerál protesaun Sivil superintendente Polisia Ismael da Costa Babo ba jornalista iha JL Villa Fatuhada, Kuarta (29/09).

Diretor gerál protesaun sivil relata, apoiu sira ne’e ba komunidade sira ne’ebé maka hetan estragus ba uma mai husi Munisipiu 12 inklui RAEOA.

“Agora apoiu ba rekoperasaun ne’e maka só sira ne’ebé maka  nia uma estragus no ba sira ne’ebé maka nia uma la estragus sira laiha direitu atu hetan apoiu ba rekoperasaun, sira iha direitu atu hetan apoiu emergénsia. Reklamasaun hirak ne’e mai husi Munisipiu 12 inklui RAEOA, no Husi númeru ne’e, ita sei verifika Ida por ida, ne’ebé husu ba inan-aman vítima sira pasensia ituan, tanba barak hanesan ne’e ita tenki verifika ho lolos tanba Osan estadu ninian no Osan ita bo’ot sira nian”, nia esplika.

Ismael akresenta, Protesaun sivil ne’e hanesan jere de’it, entaun ema hotu tenke haree didi’ak ida ne’ebé maka hetan duni dezastre, ida ne’e maka iha direitu atu hetan apoiu.

“ita tenki kuidadu no haree didi’ak para se maka iha direitu loloos nia hetan, no sira ne’ebé maka agora dadaun sei hela iha sentru evakuasaun halo kordena ona entre autoridade lokal, estatal, liu-liu Prezidenti autoridade lokál Munisipiu Dili, ba sentru evakuasaun 6 ne’e kontinua nafatin fó apoiu nesesidade báziku ba Sira.

Ita hotu hatene katak iha lubuk ida  sei iha hela sentru vokasaun no balun desidi ona, ba sira ne’ebé rai laiha ona iha Dili ba fali Munisipiu”,nia informa. LTS