Governu Limita Operasaun Aéreu

Naunil Media (Díli), Governu Konstitusionál da-ualu liuhosi Ministru Transporte no Komunikasaun (MTK), José Agostinho Da Silva, deklara nafatin fó autorizasaun ba operasaun transporte aéreu, maibe fó limitasaun semana ida  movimentasaun dala ida, tanba ho situasaun pandemia corona virus (COVID-19).

“Agora ita desidi halo limitasaun semana ida voo dala ida, ne’e vigora ba airlines, Citilink, Transnusa, Sriwijaya, Royal Bhutan no Airnort sira ne’e hotu-hotu. Ita suspende ba sidadaun estrangeiru sira ne’ebé tama mai Timor, maibé ba sidadaun Timoroan sira ne’ebé iha estranjeiru atu fila mai Timor sira nia meius transporte mak aéreu ne’e. Entaun  ita labele suspende, maibe limite deit ninia voo ne’e semana ida dala ida, nune’e bele fasilita ita nia populasaun, estudante no traballadór sira iha estranjeiru”,  hateten Ministru Transporte no Komunikasaun, José Agostinho da Silva ba jornaslista sira iha Palásiu Governu, Tersa (31/03).

Ministru Transporte no Komunikasaun, José Agostinho da Silva, hatutan kontrolu ba operasaun aéreu tenke rigorozu atu prevene covid-19 labele da’et iha rai laran.  

“Kontestu ida ne’e monitorizasaun mak tenke regorozu hosi parte saúde nian halo ona no sira labele falla hosi triazen ka kontrolu obrigatóriamente tenke kumpri regra sira ne’e. Ba kuarentena nune’e trava moras covid-19 ida ne’e labele hada’et nia sirkulasaun ne’e ba ema seluk”, Nia sujere.  

Antes ne’e Ofisiál Operasoens Voo Citilink no Sriwijaya, Fernando de Araújo, hateten kompañia deside hapara provizóriu operasoens rute Díli ba Dempasar Indonézia no Darwin mai Australia, atu prevene pandemia moras Corona Virus (COVID-19). Atm