Konfrontu Militante Partidu Iha Baucau La’ós Orientasaun Husi Líder

Naunil Media (Díli), Ekipa susesu Kandidatura Francisco Guterres “Lú Olo” Fernando Dias Gusmão hateten, Konfrontu ne’ebé horseik akontese iha munisípiu Baucau la’ós orientasaun husi líder partidu.

“Mekanizmu primeiru mak ema sira ne’ebé mak kanek ne’e tenke hetan tratamentu, segundu ita iha lei implementasaun lei ne’e mak tenke rigor katak António mak halo krime António mak tenke ba hatan, tanba ida ne’e la’ós orientasaun husi lideransa husi Kandidatu ka husi líder partidu ne’e laiha,” dehan ekipa Susesu Fernando Dias ba jornalista sira iha Salaun Luz Clarita, Segunda (07/03).

Fernando hatutan,  Dadaun ne’e komunikasaun entre líder husi partidu FRETILIN no Partidu KHUNTO la’o nafatin no kapás tebes, tanba ne’e husu ba militante simpatizantes no apoiantes sira hakmatek, tanba lideransa sira husi partidu rua iha komunikasaun ne’ebé mak di’ak,  tanba dadaun dadaun ne’e Partidu rua ne’e iha aliadu ida de’it.

Ekipa susesu ne’e hateten,  Iha akontesementu ne’e sira haree iha media ne’ebé parte husi rua ne’e hetan hotu agresaun, parte ida husi KHUNTO nia mós hetan no mós parte husi militante FRETILIN nia mós hetan,  ne’ebé sira rua ne’e hanesan de’it.

Nia dehan,  Konfrontu ne’e akontese tanba ema ida-idak no joven sira dalaruma rame demais provoka malu, sadik malu mak sai tiha situasaun ida hanesan ne’e.

Atu konkretiza loloos entre sira ne’e militante partidu nian ou lae ne’e tenke liu husi investigasaun mak bele hatene loloos, labele liu husi atributu partidu ida ne’ebé mak ema ida uza tanba ema ne’ebé la gosta Partidu seluk mós bele uza atributu partidu ida nian bele ba halo krime tanba ne’e liu husi investigasaun mak konprova nia katak nia militante duni ka lae, nia hakotu. *Jos