Ekipa Susesu Lú Olo Husu PNTL Kontrola Situasaun Kampaña Ho Di’ak

Naunil Media (Díli), Ekipa susesu husi Kandidatu Prezidente Repúblika Francisco Guterres “Lú Olo” Fernando Dias Gusmão,  husu ba Polísia Nasionál Timor-Leste (PNTL) atu kontrola situasaun kampaña ho di’ak no sé mak viola orden públika atua tuir lei ne’ebé vigora.

“Husu mós ba autoridade Polísia Nasionál Timor-Leste (PNTL) atu kontrola situasaun kampaña ninian ho di’ak, se kuandu hetan ema ruma se de’it mak viola lei, viola orden públika favor ida atua tuir ita nia lei ne’ebé mak vigora iha ita nia Nasaun”, dehan ekipa Susesu Kandidatura Francisco Guterres “Lú Olo” nian Fernando Dias Gusmão liu husi konferensia imprensa ne’ebé hala’o iha Salaun Luz Clarita, Segunda,(07/03).

Fernando Dias hatutan, Polísia kontrola situasaun kampaña ho di’ak nune’e ema sira ne’ebé hanoin ladiak ne’e labele aproveita situasaun ne’e hodi soran líder sira no mós soran povu ne’e ladiak, tanba ne’e husi Kandidatu Francisco Guterres “Lú Olo” nia Mensajen ba públiku tomak katak atu bele iha koñesimentu bele rona didiak katak laiha orientasaun atu estraga situasaun.

Fernando hateten, Kandidatu Prezidente Repúblika Francisco Guterres “Lú Olo” dadaun ne’e sei nafatin Prezidente Repúblika nasaun nian, nia sei kaer metin unidade nasionál no mós sei kaer metin funsionamentu orgaun estadu sira nian, tanba ne’e lakohi nasaun monu fali ba situasaun ne’ebé mak ema han malu ka baku malu.

Ekipa susesu ne’e argumenta katak ema individu ne’ebé mak halo krime Timor-Leste iha lei ne’ebé mak autoridade polísia sira kaer lori ba halo investigasaun tuir lei no ida ne’e ema hotu nia hakarak no mós halo investigasaun ho loloos.*Jos